سعودي عرب جي توانائي وارن هنڌن، هوائي اڏن ۽ فوجي تنصيبات تي حوثي باغين جي تازن حملن جي دعوائن کانپوءِ عالمي مارڪيٽ ۾ تيل جي قيمتن ۾ واڌ رڪارڊ ڪئي وئي آهي.
رپورٽن موجب، برينٽ خام تيل جي قيمت ۾ 17 سينٽ، يعني 0.15 سيڪڙو واڌ ٿي، جنهن کانپوءِ في بيرل قيمت 110 ڊالر ۽ 3 سينٽ تائين پهچي وئي.
ٻئي پاسي، آمريڪي ويسٽ ٽيڪساس انٽرميڊيٽ (ڊبليو ٽي آءِ) خام تيل جي قيمت ۾ به هڪ ڊالر ۽ 68 سينٽ، يعني 1.66 سيڪڙو اضافو ٿيو، جنهن کانپوءِ في بيرل قيمت 103 ڊالر ۽ 9 سينٽ ٿي وئي.
رپورٽن موجب، ان کان اڳ واپار دوران سيڙپڪارن پاران منافعو حاصل ڪرڻ لاءِ تيل وڪرو ڪرڻ سبب برينٽ خام تيل جي قيمت ۾ 3 ڊالر کان وڌيڪ گهٽتائي پڻ ٿي هئي.
حوثين سومر ڏينهن دعويٰ ڪئي هئي ته هنن سعودي عرب ۾ توانائي جي تنصيبات، هوائي اڏن ۽ فوجي هدفن کي نشانو بڻايو، جن ۾ ينبع ۾ سعودي تيل ڪمپني آرامڪو جي هڪ تنصيب، شيبه آئل فيلڊ، رياض جو ڪنگ خالد انٽرنيشنل ايئرپورٽ ۽ ابها ايئرپورٽ شامل آهن.
ٻئي طرف، سعودي اختيارين انهن حملن بابت حوثين جي دعوائن جي فوري طور تي تصديق نه ڪئي.
