پشاور (مانيٽرنگ ڊيسڪ) خيبرپختونخوا جي گورنر فيصل ڪريم ڪنڊي، مولانا فضل الرحمان جي بيانن تي ردعمل ڏيندي چيو آهي ته صوبي جي حڪومت مولانا فضل الرحمان کانسواءِ به ٺهي آهي ۽ اڳتي به هلندي. هن مولانا جي تازي تقرير تي مايوسي جو اظهار ڪندي چيو ته هو هڪ سينيئر سياستدان آهن، کانئن اهڙي گفتگو جي اميد نه هئي.
پشاور ۾ ميڊيا سان ڳالهائيندي فيصل ڪريم ڪنڊي چيو ته هو خيبرپختونخوا ۾ گورنر راڄ بابت مولانا فضل الرحمان جي موقف سان اتفاق نٿو ڪري. مولانا جو چوڻ آهي ته هو پنهنجي علائقي ۾ آزاديءَ سان گهمي ڦري نٿا سگهن، جڏهن ته گورنر موجب صوبي جي حڪومت امن امان قائم ڪرڻ لاءِ ڪوششون ڪري رهي آهي، اهو چوڻ درست ناهي ته حڪومت ان سلسلي ۾ ڪجهه به نه پئي ڪري.
فيصل ڪريم ڪنڊي وڌيڪ چيو ته خيبرپختونخوا جي اڳوڻي حڪومت جا ڪجهه فيصلا اسلام آباد بدران ڪابل ۽ قنڌار مان ايندا هئا. سندس الزام هو ته اڳوڻي حڪمرانن جا ڪجهه مفرور ماڻهو سرحد پار ويهي ماڻهن کي ڀڙڪائي رهيا آهن.
گورنر چيو ته لڪي مروت، ٽانڪ ۽ بنون ۾ موجود معدني وسيلن کي استعمال ۾ آڻڻ ضروري آهي. ان مقصد لاءِ پرڏيهي ڪمپنيون، پاڪستاني ڪمپنيون ۽ خيبرپختونخوا حڪومت گڏيل منصوبن ۾ سيڙپڪاري ڪري سگهن ٿيون.
هن واضح ڪيو ته صوبي ۾ امن قائم ڪرڻ واري معاملي تي ڪا به سوديبازي نه ٿيندي، جڏهن ته ٻين معاملن تي ڳالهين ذريعي اڳتي وڌي سگهجي ٿو.
