پاڪستان ۾ سياري جي موسم کان اڳ گئس جي فراهمي جو مسئلو هڪ ڀيرو ٻيهر ڳڻتي جو سبب بڻجي ويو آهي. قطر کان آڪٽوبر مهيني جو پهريون مائع قدرتي گئس (ايل اين جي) وارو جهاز پاڪستان پهچي ويو آهي، پر وڌندڙ طلب ۽ محدود فراهمي سبب خدشو آهي ته سياري دوران مختلف صنعتي شعبن کي گئس جي کوٽ کي منهن ڏيڻو پئجي سگهي ٿو.
قطر کان ايل اين جي جو جهاز ڪراچي پهچي ويو
رپورٽ موجب، اڱاري ڏينهن قطر کان ايل اين جي کڻي ايندڙ جهاز ’العريش‘ صبح 11 لڳي 5 منٽن تي اينگرو جي ايل اين جي ٽرمينل تي پهتو، جڏهن ته منجهند 12 وڳي گئس کي ٻيهر قدرتي گئس ۾ تبديل ڪرڻ جو عمل شروع ڪيو ويو.
سياري لاءِ ايل اين جي جا 24 جهاز گهربل
رپورٽ ۾ ڄاڻايو ويو آهي ته 2026ع-27ع جي سياري دوران ملڪ جون گئس جون ضرورتون پوريون ڪرڻ لاءِ ايل اين جي جا 24 جهاز گهربل هوندا.
سياري ۾ سوئي ناردرن گئس پائيپ لائينز لميٽيڊ جي گئس جي طلب موجوده 550 ملين ڪيوبڪ فٽ روزاني مان وڌي 1550 ملين ڪيوبڪ فٽ روزاني ٿيڻ جو امڪان آهي.
اهڙيءَ طرح سوئي سدرن گئس ڪمپني جي طلب پڻ موجوده 300 ملين ڪيوبڪ فٽ روزاني مان وڌي 500 ملين ڪيوبڪ فٽ روزاني تائين پهچي سگهي ٿي.
ڪهڙا شعبا گئس جي کوٽ کان متاثر ٿي سگهن ٿا؟
گئس جي طلب ۾ واڌ ۽ محدود فراهمي سبب خدشو ظاهر ڪيو پيو وڃي ته سياري دوران برآمدي ۽ غيربرآمدي صنعتن، سي اين جي ۽ سيمينٽ جي شعبن کي گئس جي فراهمي متاثر ٿي سگهي ٿي.
ايل اين جي جو پهريون جهاز پهچڻ باوجود سياري ۾ گئس جي وڌندڙ ضرورت پوري ڪرڻ لاءِ گهربل فراهمي يقيني بڻائڻ هڪ اهم چئلينج بڻيل آهي.
