پاڪستان انڊر 18 هاڪي ٽيم بنگلاديش کي شڪست ڏئي انڊر 18 هاڪي ايشيا ڪپ جي سيمي فائنل ۾ پهچي وئي آهي.
جاپان ۾ جاري ايونٽ جي پول بي جو آخري ميچ پاڪستان ۽ بنگلاديش جي وچ ۾ کيڏيو ويو، جنهن ۾ پاڪستان بنگلاديش کي 2 جي مقابلي ۾ 5 گولن سان شڪست ڏني.
ٽئين منٽ ۾ عبدالله پاڪستان کي برتري ڏياري، جڏهن ته ٻارهين منٽ ۾ منا اسلام مقابلو برابر ڪيو.
ٻئي ڪوارٽر ۾ ڪنهن به ٽيم گول نه ڪيو، جڏهن ته ٽئين ڪوارٽر ۾ عادل پاڪستان طرفان ٻيو گول ڪيو، پر ٽن منٽن بعد ئي بنگلاديش ٻيهر مقابلو برابر ڪري ڇڏيو.
39هين منٽ ۾ پاڪستان کي پينالٽي اسٽروڪ مليو جنهن تي حيدر عصام گول ڪري برتري حاصل ڪئي.
ان کان پوءِ عبدالله اعواڻ ۽ محمد يحيٰ فِيلڊ گول ڪري پاڪستان کي 2 جي مقابلي ۾ 5 گولن سان ڪاميابي ڏياري.
اهڙي طرح پاڪستان ٽورنامينٽ جي سيمي فائنل لاءِ ڪواليفاءِ ڪري ورتو جتي سندس مقابلو جمعي ڏينهن ڀارت سان ٿيندو۔
