پاڪستان پيپلز پارٽي جي اڳواڻ شرميلا فاروقي ترقي يافته شهرن جا مثال ڏيندي چيو آهي ته ڪراچي جهڙا مسئلا دنيا جي ٻين وڏن شهرن ۾ به پيش ايندا رهن ٿا۔
هن چيو ته ڏسو، هن وقت فرانس ۾ ڪيتري شديد گرمي پئجي رهي آهي، جتي لڳ ڀڳ 40 ماڻهو وهنجڻ لاءِ ويا ۽ ٻڏي فوت ٿي ويا۔ ايترو وڏو شهر هئڻ باوجود اهي غير محفوظ هنڌن تي ويا ۽ اهو افسوسناڪ واقعو پيش آيو۔ خدا نه ڪري، جيڪڏهن اهڙو واقعو ڪراچي ۾ پيش اچي ها ته ماڻهو فوري طور وڏي وزير جي استعيفيٰ جو مطالبو شروع ڪري ڏين ها۔
شرميلا فاروقي وڌيڪ چيو ته گذريل سال هوءَ نيويارڪ ۾ موجود هئي، جتي ايتري ته شديد برسات ٿي جو هوءَ ٻن ڏينهن تائين هوٽل کان ٻاهر نه نڪري سگهي۔ هن چيو ته نيويارڪ هڪ وڏو ۽ ترقي يافته شهر آهي، جتي پاڻي نيڪال جو باقاعده نظام موجود آهي، تنهن هوندي به اتي به اهڙن مسئلن کي منهن ڏيڻو پيو۔
شرميلا فاروقي چيو ته مسئلا هر هنڌ پيش ايندا آهن، اسان کي گهرجي ته انهن جو اعتراف ڪريون، اهو تسليم ڪريون ته اسان وٽ به خاميون موجود آهن ۽ اهو به مڃون ته انهن ۾ بهتري جي وڏي گنجائش موجود آهي، بلڪه بهتري آڻڻ ضروري آهي۔
ياد رهي ته ڪجهه مهينا اڳ شرميلا فاروقي هڪ نجي ٽي وي چينل جي پروگرام ۾ ڪراچي جو ڀيٽ پيرس سان ڪيو هو، جنهن تي کيس سوشل ميڊيا ۽ عوامي حلقن طرفان سخت تنقيد کي منهن ڏيڻو پيو هو۔
