نيويارڪ: آمريڪا ۽ ايران جي وچ ۾ معاهدي جي گونج سان عالمي مارڪيٽ ۾ تيل جي قيمتن ۾ گهٽتائي رڪارڊ ڪئي وئي آهي۔
ميڊيا رپورٽ موجب برطانوي تيل هڪ سيڪڙو سستو ٿي 92 ڊالر في بيرل ٿي ويو، جڏهن ته آمريڪي تيل جي قيمت ۾ به هڪ سيڪڙو گهٽتائي رڪارڊ ڪئي وئي ۽ اهو 87 ڊالر في بيرل تي وڪرو ٿيڻ لڳو۔
ان کان علاوه ابوظهبي جو تيار ڪيل “مربن آئل” 4 سيڪڙو مهانگو ٿيڻ کان پوءِ ان جي قيمت 93 ڊالر في بيرل ٿي وئي آهي۔
واضح رهي ته آمريڪي ۽ ايراني ڳالهيون ڪندڙ وفدن جي وچ ۾ جنگبندي ۾ واڌ ۽ ايران جي جوهري پروگرام بابت ڳالهين جي شروعات لاءِ 60 ڏينهن واري مفاهمتي يادداشت (ايم او يو) تي اتفاق ٿيو آهي۔
آمريڪي نيوز ويب سائيٽ “ايگزيئس” ذريعن جو حوالو ڏيندي ٻڌايو آهي ته صدر ڊونلڊ ٽرمپ اڃا تائين ان معاهدي جي حتمي منظوري ناهي ڏني۔
