آمريڪي صدر ڊونلڊ ٽرمپ پاران اسرائيل کي هر سال اربين ڊالرن جي مالي امداد بند ڪرڻ جي رٿابندي بابت بيان کانپوءِ آمريڪي سياست ۾ نئون بحث شروع ٿي ويو آهي، جڏهن ته ڊيموڪريٽڪ پارٽي جي ڪانگريس ميمبر رو کنا صدر ٽرمپ تي تنقيد ڪندي چيو آهي ته هو ڊيموڪريٽس جي امڪاني وڏي چونڊ ڪاميابي کان پريشان نظر اچي رهيو آهي.
رپورٽ موجب، ڊيموڪريٽڪ ڪانگريس ميمبر رو کنا سماجي رابطن واري ويب سائيٽ ايڪس تي پنهنجي بيان ۾ چيو ته ٽرمپ پاران اسرائيل جي مالي امداد بند ڪرڻ جو اعلان ظاهر ڪري ٿو ته هو آمريڪي سياست ۾ ڊيموڪريٽس جي ممڪن ڪاميابي، جنهن کي ’بليو سونامي‘ چيو پيو وڃي، کي روڪڻ لاءِ بيچين آهي.
واضح رهي ته آمريڪي سياست ۾ ’بليو سونامي‘ جي اصطلاح جو استعمال ڊيموڪريٽڪ پارٽي جي وڏي چونڊ ڪاميابي جي امڪان لاءِ ڪيو ويندو آهي.
رو کنا پنهنجي پوسٽ ۾ وڌيڪ چيو ته ڊيموڪريٽڪ پارٽي جي روايتي اڳواڻن، جيڪي ماضي ۾ ٻه ڀيرا ڊونلڊ ٽرمپ کان چونڊون هارائي چڪا آهن، اسرائيل جي امداد بند ڪرڻ واري مطالبي کي اڳ ۾ تمام سخت موقف قرار ڏيندا رهيا آهن.
هن طنزيه انداز ۾ چيو ته هاڻي ٽرمپ پاڻ ئي اهو رستو ڏيکاري ڇڏيو آهي، جنهن جو مطالبو اڳ ڊيموڪريٽڪ اڳواڻ ڪندا رهيا آهن.
رو کنا پنهنجي سوشل ميڊيا پوسٽ ۾ اسرائيل تي تنقيد ڪندڙ ڊيموڪريٽڪ اڳواڻن برني سينڊرز ۽ زهران ممداني کي پڻ ٽيگ ڪيو.
اسرائيل جي امداد تي ڊيموڪريٽس ۾ اختلاف
ٽرمپ جي بيان ۽ رو کنا جي ردعمل کانپوءِ اسرائيل لاءِ آمريڪي مالي امداد جو معاملو هڪ ڀيرو ٻيهر آمريڪي سياست جي اهم بحثن ۾ شامل ٿي ويو آهي.
هن معاملي ڊيموڪريٽڪ پارٽي اندر اسرائيل جي حمايت، مالي امداد جاري رکڻ يا بند ڪرڻ بابت موجود اختلافن کي پڻ نمايان ڪري ڇڏيو آهي.
