اسلام آباد (مانيٽرنگ ڊيسڪ) وزيراعظم شهباز شريف چيو آهي ته پاڪستان، سعودي عرب جي سلامتي، خودمختياري ۽ علائقائي سالميت جي تحفظ لاءِ برادر ملڪ سان گڏ بيٺل آهي. هن ٻنهي ملڪن وچ ۾ تاريخي ۽ ڀائراڻن لاڳاپن کي وڌيڪ مضبوط بڻائڻ ۽ مختلف شعبن ۾ سهڪار وڌائڻ جي عزم جو اظهار ڪيو آهي.
پاڪستان ۾ سعودي عرب جي نئين مقرر ٿيل سفير ڊاڪٽر راجح بن طامي البقمي وزيراعظم شهباز شريف سان ملاقات ڪئي، جنهن دوران وزيراعظم سندس آجيان ڪئي ۽ نيون ذميواريون سنڀالڻ تي مبارڪباد ڏني.
ملاقات دوران وزيراعظم چيو ته تازن سالن ۾ پاڪستان ۽ سعودي عرب جي لاڳاپن ۾ اهم اڳڀرائي ٿي آهي. هن ٻنهي ملڪن وچ ۾ مختلف شعبن ۾ ٻطرفو سهڪار وڌيڪ وڌائڻ لاءِ موجوده ادارتي نظام کي مضبوط ڪرڻ جي عزم جو پڻ ورجاءُ ڪيو.
وزيراعظم سعودي عرب تي حوثي حملن ۾ تازي واڌ جي سخت لفظن ۾ مذمت ڪندي چيو ته انهن حملن جي نتيجي ۾ قيمتي جانيون ضايع ٿيون ۽ پاڪستاني شهرين سميت ڪيترائي بيگناهه ماڻهو زخمي ٿيا. هن چيو ته پاڪستان ۽ سعودي عرب هميشه ڏکئي وقت ۾ هڪ ٻئي سان گڏ بيٺا رهيا آهن.
شهباز شريف چيو ته اسٽريٽجڪ گڏيل دفاعي معاهدو ۽ مڪي گڏيل دفاعي اتحاد ٻنهي ملڪن جي ڊگهي عرصي کان قائم ڀائراڻن لاڳاپن ۾ تاريخي سنگِ ميل آهن، جيڪي علائقائي امن ۽ سلامتيءَ لاءِ سندن گڏيل عزم جي عڪاسي ڪن ٿا.
وزيراعظم سعودي قيادت پاران پاڪستان کي فراهم ڪيل ڊگهي مدي واري اقتصادي ۽ مالي سهڪار تي پڻ ٿورا مڃيا ۽ نئين سعودي سفير کي پنهنجي ذميوارين ۾ ڪاميابيءَ لاءِ نيڪ خواهشن جو اظهار ڪيو. هن ٻنهي ملڪن جا تاريخي لاڳاپا وڌيڪ مضبوط ڪرڻ لاءِ پاڪستان پاران مڪمل سهڪار جو يقين ڏياريو.
