بيجنگ (انٽرنيشنل ڊيسڪ): چين ۽ برطانيا وچ ۾ لاڳاپن کي وڌيڪ مضبوط بڻائڻ لاءِ اهم اڳڀرائي سامهون آئي آهي، چيني صدر شي جن پنگ ۽ برطانوي وزيراعظم اينڊي برنهم وچ ۾ ٽيليفونڪ رابطو ٿيو، جنهن دوران ٻنهي ملڪن وچ ۾ سهڪار وڌائڻ ۽ گڏيل مفادن کي اڳتي وڌائڻ تي اتفاق ڪيو ويو.
چيني صدر شي جن پنگ چيو ته چين ۽ برطانيا وچ ۾ اختلافن جي مقابلي ۾ گڏيل مفاد وڌيڪ آهن، تنهن ڪري اختلافن تي ضابطو آڻڻ ۽ گڏيل مفادن تي ٻڌل سهڪار کي وڌائڻ ضروري آهي.
هن چيو ته ٻنهي ملڪن کي ٽيڪنالاجي، تعليم، صحت ۽ مالياتي شعبن ۾ سهڪار وڌيڪ مضبوط ڪرڻ گهرجي.
شي جن پنگ برطانيا ۾ چيني سيڙپڪارن جي جائز حقن ۽ مفادن جي تحفظ کي يقيني بڻائڻ تي پڻ زور ڏنو.
ٻئي طرف برطانوي وزيراعظم اينڊي برنهم چيو ته ٻنهي ملڪن وچ ۾ عملي سهڪار اقتصادي ترقي ۽ عوام جي زندگي جو معيار بهتر بڻائڻ ۾ اهم ڪردار ادا ڪري سگهي ٿو.
هن چين ۽ برطانيا وچ ۾ گڏيل سهڪار کي وڌيڪ وسيع ڪرڻ جي اهميت تي زور ڏنو.
برطانوي ميڊيا موجب ٻنهي اڳواڻن وچ ۾ روس-يوڪرين جنگ، انساني حقن ۽ ٻين اهم عالمي ۽ گڏيل معاملن تي پڻ خيالن جي ڏي وٺ ڪئي وئي.
ٻنهي ملڪن وچ ۾ اختلافن باوجود گڏيل مفادن جي بنياد تي سهڪار وڌائڻ واري اتفاق کي عالمي سطح تي چين ۽ برطانيا جي لاڳاپن ۾ اهم اڳڀرائي قرار ڏنو پيو وڃي.
