واشنگٽن: آمريڪي ميڊيا ۽ ٿنڪ ٽينڪس جي رپورٽن موجب ايران جي ميزائل ۽ ڊرون حملن کان پوءِ آمريڪا وچ اوڀر ۾ موجود پنهنجي فوجي اڏن جي ڪجهه حصن کي وڌيڪ اولهه طرف، ممڪن طور تي اسرائيل منتقل ڪرڻ تي غور ڪري رهيو آهي.
آمريڪي ميڊيا رپورٽن موجب ايران جي ميزائل حملن خليجي ملڪن ۾ موجود آمريڪي فوجي اڏن جي ڪمزورين کي نمايان ڪري ڇڏيو آهي.
ايران اهي حملا 28 فيبروري تي ايران خلاف آمريڪي ۽ اسرائيلي بمباري شروع ٿيڻ کان پوءِ ڪيا هئا. انهن حملن دوران خطي ۾ موجود آمريڪي ۽ اتحادي فوجي تنصيبات کي نشانو بڻايو ويو، جنهن جي نتيجي ۾ 13 فوجي مارجي ويا ۽ سوين زخمي ٿيا. بهرحال جاني ۽ مالي نقصانن بابت مڪمل سرڪاري تفصيل اڃا تائين جاري نه ڪيا ويا آهن.
وال اسٽريٽ جرنل موجب سڀ کان وڌيڪ متاثر ٿيندڙ هنڌن ۾ بحرين ۾ واقع نيول سپورٽ اڪٽيويٽي شامل آهي، جتي آمريڪي بحريه جي ففٿ فليٽ جو هيڊڪوارٽر قائم آهي. هي اڏو ايران کان لڳ ڀڳ 240 ڪلوميٽر ڏکڻ طرف واقع آهي.
رپورٽ مطابق حملن ۾ ففٿ فليٽ جي هيڊڪوارٽر عمارت، بيرڪس، گودامن ۽ پيئڻ جي پاڻي جي ذخيرن کي نقصان پهتو. اندازن موجب هن اڏي کي لڳ ڀڳ 400 ملين ڊالرن جو نقصان ٿيو، جڏهن ته پينٽاگون نقصان جي مڪمل تفصيل عوام آڏو ظاهر نه ڪئي آهي.
انهن حملن کان پوءِ آمريڪي انتظاميا اندر خليجي خطي ۾ پنهنجي فوجي حڪمت عملي تي ٻيهر غور شروع ڪيو ويو آهي. غور هيٺ تجويزن ۾ بحرين ۾ اهم ڪمانڊ مرڪزن کي زمين هيٺ منتقل ڪرڻ، دفاعي تنصيبات کي وڌيڪ مضبوط بڻائڻ ۽ ڪجهه تباهه ٿيل عمارتن جي ٻيهر تعمير نه ڪرڻ جهڙا قدم شامل آهن.
آمريڪا ڪويت ۽ سعودي عرب ۾ پنهنجي فوجي موجودگي جو به جائزو وٺي رهيو آهي، جڏهن ته ڪجهه فوجي اثاثن کي وڌيڪ اولهه طرف منتقل ڪرڻ تي غور جاري آهي. شروعاتي منصوبابندي ۾ اسرائيل به هڪ ممڪن هنڌ طور شامل آهي، جتي رپورٽن موجب تڪرار شروع ٿيڻ کان اڳ ئي آمريڪي فوجي جهاز بن گوريون ايئرپورٽ تي مقرر ڪيا ويا هئا.
ٻئي طرف آمريڪن انٽرپرائز انسٽيٽيوٽ جي هڪ رپورٽ موجب ايراني حملن جي نتيجي ۾ ستن ملڪن ۾ واقع 11 آمريڪي فوجي اڏن جي 70 عمارتن کي مجموعي طور لڳ ڀڳ 5 ارب ڊالرن جو نقصان پهتو.
رپورٽ ۾ چيو ويو آهي ته ميزائل ۽ ڊرون حملن جي مستقل خطري کي نظر ۾ رکندي آمريڪا کي نه رڳو وڏي پيماني تي ٻيهر تعمير ڪرڻي پئجي سگهي ٿي، پر ڪجهه حساس فوجي تنصيبات کي مڪمل طور ڇڏڻ يا ٻئي هنڌ منتقل ڪرڻ تي به مجبور ٿيڻو پئجي سگهي ٿو.
