آمريڪي پرڏيهي کاتي اعلان ڪيو آهي ته اسرائيل ۽ لبنان وچ ۾ ڳالهين جو نئون دور ايندڙ هفتي واشنگٽن ڊي سي ۾ منعقد ٿيندو، جتي ٻنهي ملڪن جا نمائندا 23 ۽ 25 جون تي ملاقاتون ڪندا۔
پرڏيهي کاتي موجب آمريڪي پرڏيھي وزير مارڪو روبيو جمعي ڏينهن جوزف اون سان ٽيليفونڪ ڳالهه ٻولهه ڪئي۔
ان دوران روبيو زور ڏنو ته اسرائيل سان ٻطرفيون ڳالهيون ئي لبنان جي ٻيهر تعمير، معاشي بحالي ۽ بار بار ٿيندڙ تشدد جي خاتمي جو واحد قابلِ عمل رستو آهن۔
بيان ۾ چيو ويو آهي ته ايندڙ ڳالهين دوران ٻئي خودمختيار حڪومتون “ديرپا امن” قائم ڪرڻ طرف اڳڀرائي ڪرڻ جي ڪوشش ڪنديون۔
اسرائيل ۽ لبنان اپريل 2026 ۾ سڌين ڳالهين جو آغاز ڪيو هو، جيڪو 1993 کان پوءِ ٻنهي ملڪن جي وچ ۾ پهريون سڌو ملاقات وارو موقعو هو۔
ان کان پوءِ جون ۾ به ڳالهين جو هڪ ٻيو دور ٿيو، جنهن جي نتيجي ۾ ٻنهي ڌرين جنگ ۾ عارضي وقفي جو اعلان ڪيو هو۔
تنهن هوندي به تجزيه نگارن موجب انهن ڳالهين ۾ حزب الله جي عدم شموليت هڪ وڏي رڪاوٽ آهي، ڇو ته اها تنظيم ڏکڻ لبنان ۾ هڪ اهم فوجي ۽ سياسي قوت سمجهي وڃي ٿي۔
نومبر 2024 جي جنگبندي کان پوءِ لبنان جي حڪومت آمريڪي حمايت يافته منصوبي تحت حزب الله کي غير مسلح ڪرڻ جي ڪوشش ڪري رهي آهي، جڏهن ته ٻئي پاسي لبنان اسرائيلي فوجن جي ڏکڻ لبنان مان مڪمل واپسي جو مطالبو پڻ ڪندو رهيو آهي۔
ٻئي پاسي ايران ۽ آمريڪا جي وچ ۾ جنگ جي خاتمي لاءِ طئي ٿيل مفاهمتي يادداشت (MoU) ۾ لبنان جي خودمختياري ۽ علائقائي سالميت جي تحفظ جو واعدو ڪيو ويو آهي، پر لبنان ۾ جاري جهڙپون هن عمل کي متاثر ڪري رهيون آهن۔
