بچاءَ واري وزير خواجه آصف چيو آهي ته آزاد ڪشمير ۾ امن تباهه ڪرڻ جي ڀارت جي ڪوشش ناڪام ٿي وئي آهي۔
پارليامينٽ هائوس ۾ صحافين سان ڳالهائيندي هن چيو ته ڪشمير ۾ اهڙا عنصر سرگرم آهن، جيڪي ڀارت جي اشاري تي آزاد ڪشمير ۾ ڏنل قربانين کي وساري رهيا آهن۔
خواجه آصف جو چوڻ هو ته والاريل ڪشمير ۾ اڄ به ظلم ۽ ڏاڍ جاري آهي، اتي جي قيادت جيلن ۾ زندگي گذاريندي رهي آهي، ۽ والاريل ڪشمير جي ڪشميرين جي قربانين جي هڪ ڊگهي تاريخ موجود آهي۔
هن وڌيڪ چيو ته جيڪڏهن پاڪستان خلاف سرگرم ڪنهن به گروهه جا لاڳاپا ڀارت سان ملن ٿا ته پوءِ اسان کي انهن جي خلاف فيصلائتي جنگ وڙهڻ گهرجي۔
سندس چوڻ هو ته بنون ۾ افسوسناڪ واقعو پيش آيو، جتي معصوم ماڻهن کي شهيد ڪيو ويو۔ هاڻي وقت اچي ويو آهي ته اسين اتحاد سان دهشتگردي خلاف فيصلائتي جنگ وڙهون، جيئن هن دهشتگردي کي هڪ ئي ڀيري پاڙان پٽي ختم ڪري سگهجي۔
وفاقي وزير خواجه آصف چيو ته پاڪستان ۾ دهشتگردي جي پٺيان ڀارت ۽ افغانستان آهن۔ گذريل سال جي شڪست کان پوءِ افغانستان به ڀارت سان گڏجي پاڪستان جي سرزمين تي دهشتگردي کي هٿي ڏئي رهيو آهي۔
خواجه آصف وڌيڪ چيو ته منهنجي خيال ۾ هاڻي وقت اچي ويو آهي ته فيصلائتي جنگ وڙهي انهن کي شڪست ڏني وڃي۔ پاڪستان جو ڪو به صوبو هجي، اتي امن ۽ سڪون جو ماحول قائم ڪرڻ اسان جي ذميواري آهي۔
