تڪراري مذهبي اسڪالر ۽ ميڊيا شخصيت مفتي عبدالقوي هڪ ڀيرو ٻيهر تڪرار جو مرڪز بڻجي ويو آهي، جتي سندس هڪ وڊيو سوشل ميڊيا تي وائرل ٿيڻ بعد سخت ردعمل سامهون اچي رهيو آهي.
رپورٽن موجب، مفتي عبدالقوي کي مبينا طور هڪ “ريو پارٽي” ۾ ڏٺو ويو، جيڪا عام طور تي ڊي جي جي تيز موسيقي، رقص ۽ مغربي انداز جي محفلن لاءِ سڃاتي ويندي آهي. وڊيو ۾ ڏسي سگهجي ٿو ته هو پنهنجي روايتي لباس ۾ اهڙي محفل ۾ موجود آهي، جتي ڊي جي ميوزڪ هلي رهيو آهي ۽ شرڪت ڪندڙ سندس موجودگي ڏانهن اشارا ڪري رهيا آهن.
هي وڊيو منظرعام تي اچڻ شرط سوشل ميڊيا تي بحث جو طوفان برپا ٿي ويو. ڪيترن صارفين طنزيه ۽ تنقيدي تبصرا ڪيا، جڏهن ته ڪجهه ماڻهن ان کي مذهبي شخصيت لاءِ غير مناسب قرار ڏنو. هڪ صارف طنزيه انداز ۾ لکيو ته “GTA 6 کان اڳ مفتي کي ريو پارٽي ۾ ڏسي ورتو”، جڏهن ته ٻئي صارف چيو ته ماضي ۾ قنديل بلوچ پاران ڪيل دعوائون هاڻي سچ ثابت ٿين ٿيون.
واضح رهي ته مفتي عبدالقوي اڳ به ڪيترن ئي تڪرارن سبب خبرن ۾ رهيو آهي، جن ۾ قنديل بلوچ سان لاڳاپيل اسڪينڊل، حج اسڪينڊل ۽ سوشل ميڊيا اسٽار حريم شاه سان وڊيوز شامل آهن. ان ڪري هن تازي وڊيو کي به سندس متنازع ماضي جي تسلسل طور ڏٺو پيو وڃي.
تجزئي نگارن موجب، اهڙيون وڊيوز نه رڳو فرد جي ساک تي اثرانداز ٿين ٿيون، پر سماج ۾ مذهبي شخصيتن جي ڪردار بابت به نوان سوال اڀارين ٿيون. بهرحال، مفتي عبدالقوي طرفان هن وڊيو بابت اڃا تائين ڪو باضابطه موقف سامهون ناهي آيو.
