ڪراچي: سنڌ جي سينئر وزير ۽ اطلاعات، ٽرانسپورٽ ۽ ماس ٽرانزٽ واري صوبائي وزير شرجيل انعام ميمڻ چيو آهي تہ اڳ صبح جو شروعات اخبار سان ٿيندي هئي، پر هاڻي رجحان تبديل ٿي رھيا آهن، اسان چاهيون ٿا تہ اخباري صنعت ترقي ڪري، سوشل ميڊيا تي گهڻيون خبرون غلط ۽ جعلي آهن، اخبار هڪ مستند دستاويز آهي.
سي پي اين اي جي اجلاس جي موقعي تي ميڊيا سان ڳالهائيندي هن چيو تہ ٽي وي تي بريڪنگ نيوز جي ڊوڙ آهي، پرنٽ ميڊيا هن وقت سخت مشڪلاتن کي منهن ڏئي رھي آهي، اليڪٽرانڪ ميڊيا اخبارن کي ڏکيو وقت ڏنو آهي، اسان جي ڪوشش آهي ته اخبارن کي مضبوط بڻايون.
شرجيل ميمڻ چيو تہ پيپلز پارٽي هميشه ڪوشش ڪئي آهي ته ميڊيا ترقي ڪري، سٺي جمهوريت صرف ميڊيا جي آزادي سان ئي ڪامياب ٿيندي آهي، ڪجهه دورن ۾ پيپلز پارٽي بدترين ميڊيا ٽرائل جو شڪار رهي، پر پيپلز پارٽي ڏکئي دور ۾ ميڊيا سان گڏ بيٺل رهي، پيپلز پارٽي ڪڏهن به انتقام جي سياست نه ڪئي آهي،
هن چيو ته هر دور ۾ اينڪرز کي آف ڪرائڻ جي ڪوشش ٿيندي رهي، مختلف پارٽين جون حڪومتون اينديون ته چونديون ته فلاڻي اينڪر کي هٽايو، پيپلز پارٽي ڪڏهن به ڪنهن ميڊيا هائوس کي صحافي هٽائڻ لاءِ نه چيو، پي پي پي جو وڪٽمائيزيشن جو مائنڊ سيٽ ڪڏهن به نه رهيو، صدر آصف علي زرداري هميشه صبر، تحمل ۽ برداشت جو مظاهرو ڪيو.
سينيئر وزير شرجيل انعام ميمڻ چيو ته اسان گڏجي سٺي صحافت کي اڳتي وڌايون، اسان وٽ خبرن جي دوڙ ۾ ملڪ خلاف خبرون به هلن ٿيون، ترقي يافته ملڪن ۾ به ڏوهن جا ڪيس ٿين ٿا پر اتي اهڙيون خبرون نه ٿيون هلن.
هن چيو ته اسان کي پاڪستان پنهنجي جان کان وڌيڪ پيارو آهي، هميشه منفي خبر تي ڌيان نه ڏيڻ گهرجي، ميڊيا کي خوبيون به اجاگر ڪرڻيون آهن، اسان کي ملڪ کي سٺي نموني سامهون آڻڻو پوندو، دنيا کي ڏيکارڻو پوندو ته پاڪستان ۾ سيڙپڪاري جا موقعا موجود آهن، ڪيترن ملڪن ۾ حادثو ٿيو ته ڪو ويجهو به نه ويندو، اسان کي مثبت شيون به اڳتي آڻڻيون آهن.
شرجيل انعام ميمڻ چيو ته اسان جون اکيون ۽ ڪن ميڊيا آهن، پاڪستان پيپلز پارٽي هميشه ميڊيا دوست رهي آهي.
هن چيو ته حڪومت پي ٽي آءِ جي باني جي ڀينرن سان ملاقات ڪرائي، قيدي جي ذاتي سوشل ميڊيا اڪائونٽ تان اخلاقيات سان لاڳاپيل ڳالهه شيئر ڪئي وئي، پي ٽي آءِ قيادت ڀارتي ميڊيا کي انٽرويو ۾ ملڪ کي تڪراري بڻائي رهي آهي، ھو ڀارتي ميڊيا کي انٽرويو ڏئي ڇا ثابت ڪرڻ چاهين ٿا.
شرجيل انعام ميمڻ چيو ته پارٽي سان ماضي ۾ جيڪو ٿيو اهو ڪنهن ٻي جماعت سان نه ٿيو، قائد عوام شهيد ڪيو ويو، محترمه بينظير ڀٽو شهيد ڪئي وئي، ڪجهه سياسي پارٽين جي قيادت جيل وئي ته انهن جو موقف بدلجي ويو، پيپلز پارٽي ڪڏهن پنهنجو موقف نه بدلايو ۽ نه ئي ملڪ جي ادارن خلاف ڳالهه ڪئي، شهيد بي بي جي شهادت جي وقت ماڻهو سراپا احتجاج هئا، ان وقت صدر آصف علي زرداري پاڪستان کپي جو نعرو بلند ڪيو.
هن چيو ته ڪوڙ سان ملڪ خلاف بيانیو هلائيو ويو، باني پي ٽي آءِ جنرل باجوہ کي تاحيات توسيع ڏيڻ جو ڳالھ ڪندو هو، هن ملڪ ۾ نفرت ڦهلائي.
سينيئر وزير شرجيل انعام ميمڻ چيو ته ڊي جي آءِ ايس پي آر جي پريس ڪانفرنس درست هئي، پرڏيهي ملڪ مان سوشل ميڊيا تي ٽرولنگ ڪئي وئي، اهي ماڻهو پرڏيهي ملڪ مان ٽوئيٽ ڪندا آهن، اها ملڪ کي نقصان پهچائڻ جي ناڪام سازش آهي.
