روم (انٽرنيشنل ڊيسڪ): اٽلي جي وزيراعظم جارجيا ميلوني ٻي عالمي جنگ کانپوءِ ملڪ جي سڀ کان ڊگهي عرصي تائين وزيراعظم رهندڙ اڳواڻ بڻجي نئون تاريخي رڪارڊ قائم ڪري ڇڏيو آهي.
جارجيا ميلوني سوشل ميڊيا پليٽ فارم ايڪس تي پنهنجي حڪومت جي نئين رڪارڊ جو ذڪر ڪندي چيو ته سندس حڪومت اٽلي جي جمهوريه جي تاريخ ۾ سڀ کان ڊگهي عرصي تائين ڪم ڪندڙ حڪومت بڻجي وئي آهي.
ميلوني چيو ته هوءَ هن ڪاميابي کي شڪرگذاري ۽ ذميواري جي گهري احساس سان قبول ڪري ٿي. سندس چوڻ هو ته سياسي استحڪام صرف ڪو رڪارڊ ناهي، جنهن تي فخر ڪيو وڃي، پر اها اهڙي صورتحال آهي جيڪا ڪنهن ملڪ کي مستقبل جي منصوبابندي، فيصلا ڪرڻ، واعدا پورا ڪرڻ ۽ عالمي سطح تي عزت حاصل ڪرڻ ۾ مدد ڏئي ٿي.
جارجيا ميلوني جي موجوده حڪومت جو هي رڪارڊ اٽلي جي سياسي تاريخ ۾ اهم سنگِ ميل قرار ڏنو پيو وڃي، ڇاڪاڻ ته ملڪ جي سياست ۾ ماضي ۾ حڪومتن جي مختصر عرصي ۽ بار بار تبديلين جو رجحان رهيو آهي.
ميلوني جي حڪومت جو ڊگهي عرصي تائين برقرار رهڻ سندس سياسي استحڪام ۽ قيادت لاءِ اهم ڪاميابي طور سامهون آيو آهي.
