لنڊن (انٽرنيشنل ڊيسڪ): برطانيا ۽ فرانس جي گڏيل تاريخ کي اجاگر ڪندڙ هڪ خاص تقريب دوران برطانوي بادشاهه چارلس ٽئين، راڻي ڪميلا، فرانسيسي صدر ايمانوئل ميڪرون ۽ سندس گهرواري بريجٽ ميڪرون جي ملاقات جون تصويرون ۽ وڊيوز سوشل ميڊيا تي ڌيان جو مرڪز بڻجي ويون.
فرانسيسي صدر ايمانوئل ميڪرون ۽ سندس گهرواري بريجٽ ميڪرون برطانيا جي دوري دوران بادشاهه چارلس ٽئين ۽ راڻي ڪميلا سان گڏ برٽش ميوزيم جو دورو ڪيو، جتي تقريبن هڪ هزار سال پراڻي تاريخي ”بائيو ٽيپسٽري“ جي نمائش ۽ رونمائي جي تقريب منعقد ڪئي وئي.
راڻي ڪميلا ۽ ميڪرون جي ملاقات
برٽش ميوزيم پهچڻ دوران ٻنهي شاهي ۽ صدارتي جوڙن جو گرمجوشي سان استقبال ڪيو ويو. تقريب دوران راڻي ڪميلا ۽ صدر ميڪرون وچ ۾ مختصر پر خوشگوار ملاقات به ٿي، جنهن جون تصويرون خاص طور تي ڌيان جو مرڪز بڻيون.
وڊيو ۾ ڏسي سگهجي ٿو ته ميوزيم پهچڻ تي صدر ايمانوئل ميڪرون راڻي ڪميلا سان شائستگي سان ملاقات ڪئي، جڏهن ته تقريب ۾ ٻنهي ملڪن جي اعليٰ قيادت گڏ نظر آئي.
هزار سال پراڻي تاريخي ٽيپسٽري جي نمائش
هي تقريب تقريبن 70 ميٽر ڊگهي تاريخي ”بائيو ٽيپسٽري“ جي نمائش لاءِ منعقد ڪئي وئي، جيڪا لڳ ڀڳ هڪ هزار سالن کان پوءِ پهريون ڀيرو برطانيا آندي وئي آهي.
بائيو ٽيپسٽري قرونِ وسطيٰ جي هڪ اهم تاريخي ورثي طور سڃاتي وڃي ٿي، جنهن ۾ برطانيا ۽ فرانس جي وچ ۾ صدين پراڻي گڏيل تاريخ سان لاڳاپيل واقعا ۽ منظر پيش ڪيا ويا آهن.
بادشاهه چارلس ۽ ميڪرون گڏ ميوزيم پهتا
تقريب ۾ بادشاهه چارلس ٽئين ۽ فرانسيسي صدر ايمانوئل ميڪرون هڪ ئي سرڪاري بينٽلي ۾ برٽش ميوزيم پهتا، جڏهن ته راڻي ڪميلا ۽ بريجٽ ميڪرون الڳ گاڏي ۾ ميوزيم پهتيون.
بعد ۾ ٻنهي شاهي ۽ صدارتي جوڙن کي گڏ ميوزيم ۾ داخل ٿيندي ڏٺو ويو، جتي ميڪرون ۽ سندس گهرواري بادشاهه چارلس ۽ راڻي ڪميلا سان گڏ تقريب ۾ شرڪت ڪئي.
چارلس ٽئين جو انگريزي ۽ فرانسيسي ۾ خطاب
تقريب دوران بادشاهه چارلس ٽئين بائيو ٽيپسٽري جي تاريخي اهميت تي روشني وڌي ۽ برطانيا ۽ فرانس جي وچ ۾ صدين کان قائم گڏيل تاريخ جو ذڪر ڪيو.
بادشاهه چارلس انگريزي ۽ فرانسيسي ٻنهي ٻولين ۾ خطاب ڪندي ٽيپسٽري ۾ ڏيکاريل سفرن، بادشاهن، مشاورت ۽ انهن مان جنم وٺندڙ تاريخي واقعن جو ذڪر ڪيو.
هن تاريخي ورثي کي ٻنهي ملڪن جي گڏيل ماضي سان جوڙيندي چيو ته ٽيپسٽري ۾ بلند عزمن سان گڏ غيريقيني صورتحال ۽ ان دور جي اهم واقعن جي عڪاسي به نظر اچي ٿي.
برطانوي شاهي خاندان ۽ فرانسيسي صدارتي جوڙي جي گڏيل شرڪت واري هي تقريب ٻنهي ملڪن جي تاريخي لاڳاپن ۽ ثقافتي ورثي کي اجاگر ڪرڻ جو اهم موقعو بڻجي وئي.
