اسلام آباد: (بيورورپورٽ) سينيٽ جي آءِ ٽي بابت قائمه ڪميٽي جي ذيلي ڪميٽي جي اجلاس ۾ آءِ ٽي ۽ ٽيليڪميونيڪيشن واري وزارت سفارش ڪئي آهي ته ملڪ جي سمورن ٽيليڪام آپريٽرن کي پنهنجن موبائل فون ٽاورن تي سولر توانائي جا نظام لڳائڻ جو پابند بڻايو وڃي، جيئن بجلي جي وڌندڙ خرچن، توانائي جي کوٽ ۽ مواصلاتي خدمتن ۾ ايندڙ رڪاوٽن کي گهٽائي سگهجي.
اجلاس دوران وزارت جي عملدارن بريفنگ ڏيندي ٻڌايو ته ملڪ جي ڪجهه علائقن، خاص طور سيڪيورٽي جي حساس علائقن ۾، ٽيليڪام ٽاورن جي انفراسٽرڪچر کي مختلف مسئلن کي منهن ڏيڻو پوي ٿو. اهڙين حالتن ۾ بجلي جي فراهمي متاثر ٿيڻ سبب موبائل ۽ انٽرنيٽ جون خدمتون به متاثر ٿين ٿيون.
عملدارن جو چوڻ هو ته جيڪڏهن ٽيليڪام ٽاورن کي سولر توانائي تي منتقل ڪيو وڃي ته نه رڳو بجلي تي خرچ گهٽ ٿيندو، پر بجلي جي بندش يا ايندھن جي کوٽ جي باوجود به مواصلاتي نظام کي مسلسل فعال رکڻ ۾ مدد ملندي.
اجلاس ۾ اها ڳالهه پڻ سامهون آئي ته پاڪستان ۾ ٽيليڪام نيٽ ورڪ ملڪ جي ڊجيٽل معيشت، آن لائين ڪاروبار، بينڪنگ، تعليم، صحت ۽ هنگامي خدمتن لاءِ بنيادي اهميت رکي ٿو. تنهن ڪري ٽاورن جي بنا رڪاوٽ آپريشن کي يقيني بڻائڻ ضروري آهي.
ڪميٽي جي ميمبرن خيال ظاهر ڪيو ته سولر توانائي جي استعمال سان ٽيليڪام ڪمپنين جا آپريٽنگ خرچ به گهٽ ٿيندا، ماحولياتي آلودگي ۾ به گهٽتائي ايندي ۽ قابل تجديد توانائي جي استعمال کي هٿي ملندي.
آءِ ٽي وزارت سفارش ڪئي ته لاڳاپيل ريگيوليٽري ادارا ۽ حڪومت اهڙي پاليسي تيار ڪن، جنهن تحت ٽيليڪام ڪمپنين کي مرحليوار پنهنجي ٽاورن تي سولر سسٽم نصب ڪرڻ جو پابند بڻايو وڃي. ان سان ملڪ جي مواصلاتي نظام کي وڌيڪ مستحڪم، محفوظ ۽ توانائي جي حوالي سان خودمختيار بڻائي سگهجي ٿو.
اجلاس ۾ اهو به زور ڀريو ويو ته جديد ۽ پائيدار توانائي ذريعن جو استعمال پاڪستان جي ڊجيٽل انفراسٽرڪچر کي مستقبل جي ضرورتن مطابق مضبوط بڻائڻ لاءِ اهم قدم ثابت ٿيندو.
