اسلام آباد / نئين دهلي: (انٽرنيشنل ڊيسڪ) پاڪستان ۽ ڀارت جي 117 نامور شخصيتن، جن ۾ اڳوڻا سفارتڪار، سياستدان، دانشور، اديب، صحافي، قانوندان ۽ سول سوسائٽي جا نمائندا شامل آهن، پاڪستان جي وزيراعظم شهباز شريف ۽ ڀارت جي وزيراعظم نريندر مودي کي گڏيل کليل خط لکي ٻنهي ملڪن وچ ۾ ڳالهين جو سلسلو ٻيهر شروع ڪرڻ ۽ لاڳاپا معمول تي آڻڻ جي اپيل ڪئي آهي.
خط ۾ چيو ويو آهي ته پاڪستان ۽ ڀارت دنيا جي لڳ ڀڳ پنجين حصي جي آبادي جو گهر آهن، جتي لکين نوجوان بهتر مستقبل، روزگار، امن ۽ ترقي جا خواهشمند آهن. مسلسل ڇڪتاڻ ۽ دشمني سبب ٻنهي ملڪن جا عوام، خاص طور نوجوان، امن، خوشحالي ۽ ترقي جي ڪيترن ئي موقعن کان محروم ٿي رهيا آهن.
خط تي صحيح ڪندڙ شخصيتن جو چوڻ آهي ته “دوستن سان ڳالهائڻ ايترو ضروري نه هوندو آهي، جيترو دشمنن سان ڳالهائڻ ضروري هوندو آهي.” سندن خيال موجب اختلافن جو حل جنگ يا ڌمڪين ۾ نه، پر مسلسل ۽ بامقصد ڳالهين ۾ موجود آهي. ٻنهي حڪومتن کي اعتماد سازي جا قدم کڻڻ گهرجن ته جيئن خطي ۾ امن، استحڪام ۽ اقتصادي ترقي کي هٿي ملي سگهي.
خط ۾ ٻنهي حڪومتن کان مطالبو ڪيو ويو آهي ته اعليٰ سفيرن (هاءِ ڪمشنرن) جي مقرري ٻيهر بحال ڪئي وڃي، ويزا جون سهولتون عام شهرين لاءِ ٻيهر کوليون وڃن، هوائي رستا بحال ڪيا وڃن، واپار، ثقافتي ۽ علمي مٽاسٽا کي ٻيهر فروغ ڏنو وڃي، سرحدي ڇڪتاڻ گهٽائڻ ۽ مستقل سفارتي ڳالهين جو نظام قائم ڪيو وڃي.
رپورٽن موجب هن خط تي پاڪستان ۽ ڀارت جي ڪيترين ئي مشهور شخصيتن صحيحون ڪيون آهن، جن ۾ اڳوڻا حڪومتي عهديدار، سفارتڪار، دانشور ۽ سياسي اڳواڻ شامل آهن. هنن زور ڀريو آهي ته ٻنهي ملڪن جا شهري امن، تعاون ۽ گڏيل ترقي جا خواهشمند آهن، تنهن ڪري حڪومتن کي به عوامي خواهشن جو احترام ڪندي ڳالهين جو دروازو ٻيهر کولڻ گهرجي.
ٻئي طرف، ڀارت جي حڪمران جماعت بي جي پي سان لاڳاپيل اڳواڻن هن اپيل تي تنقيد ڪندي پنهنجي پراڻي موقف کي ورجايو آهي ته دهشتگردي ۽ ڳالهين جو عمل گڏ هلي نٿو سگهي. بهرحال، خط تي صحيح ڪندڙ شخصيتن جو اصرار آهي ته اختلافن جي باوجود رابطن جو سلسلو جاري رهڻ گهرجي، ڇو ته پائيدار امن جو واحد رستو سفارتڪاري ۽ ڳالهه ٻولهه آهي.
