اسلام آباد: (بيورورپورٽ) پاڪستان ۽ سعودي عرب وچ ۾ سلامتي ۽ داخلي سيڪيورٽي جي شعبي ۾ تعاون کي وڌيڪ هٿي ڏيڻ لاءِ هڪ اهم مفاهمتي يادداشت (ايم او يو) تي صحيحون ڪيون ويون آهن. ٻنهي ملڪن ان عزم جو اظهار ڪيو آهي ته دهشتگردي، منظم ڏوهن، منشيات جي اسمگلنگ، سرحدي سلامتي ۽ ٻين سيڪيورٽي معاملن ۾ گڏيل سهڪار کي وڌيڪ مضبوط بڻايو ويندو.
سعودي عرب جي گهرو وزير شهزادو عبدالعزيز بن سعود بن نايف طرفان جاري ڪيل بيان ۾ چيو ويو ته پاڪستاني اختيارين سان ملاقات دوران ٻنهي ملڪن جي وچ ۾ موجود ويجهن ۽ ڀائراڻن لاڳاپن تي اطمينان جو اظهار ڪيو ويو. هن چيو ته ٻنهي ڌرين سلامتي جي شعبي ۾ تعاون کي وڌيڪ وسيع ۽ مؤثر بڻائڻ لاءِ پنهنجي گڏيل عزم کي ورجايو ۽ ان سلسلي ۾ هڪ مفاهمتي يادداشت تي صحيحون ڪيون.
بيان موجب، هي معاهدو ٻنهي ملڪن جي قانون لاڳو ڪندڙ ادارن وچ ۾ رابطن کي هٿي ڏيندو، معلومات جي ڏي وٺ کي بهتر بڻائيندو ۽ سلامتي کي درپيش گڏيل چئلينجن کي منهن ڏيڻ لاءِ گڏيل حڪمت عملي اختيار ڪرڻ ۾ مددگار ثابت ٿيندو.
ذريعن موجب، پاڪستان ۽ سعودي عرب اڳ ئي دفاع، دهشتگردي جي خاتمي، سرحدي سلامتي، تربيت ۽ انٽيليجنس جي شعبن ۾ ويجهو تعاون جاري رکندا آيا آهن، جڏهن ته نئين مفاهمتي يادداشت سان ٻنهي ملڪن جي ادارن وچ ۾ عملي سهڪار کي وڌيڪ منظم ۽ وسيع بڻائڻ جا امڪان پيدا ٿيندا.
تجزئي نگارن جو چوڻ آهي ته وچ اوڀر ۽ ڏکڻ ايشيا ۾ تبديل ٿيندڙ سلامتي جي صورتحال کي نظر ۾ رکندي پاڪستان ۽ سعودي عرب وچ ۾ اهڙي تعاون جي اهميت وڌيڪ وڌي وئي آهي. ٻنهي ملڪن جو مقصد خطي ۾ امن، استحڪام ۽ دهشتگردي جي خاتمي لاءِ گڏيل ڪوششن کي وڌيڪ مؤثر بڻائڻ آهي.
پاڪستان ۽ سعودي عرب جا لاڳاپا تاريخي، مذهبي ۽ اقتصادي بنيادن تي قائم آهن. ٻنهي ملڪن جي قيادت بار بار ان ڳالهه جو اظهار ڪندي رهي آهي ته اهي هر شعبي، خاص طور سلامتي، دفاع، معيشت ۽ سيڙپڪاري ۾ پنهنجو تعاون وڌيڪ مضبوط بڻائيندا.
