ڪراچي:(شوبز نيوز) پاڪستان ۾ پهريون ڀيرو عالمي شهرت يافته ريئلٽي ٽيلنٽ شو “پاڪستانز گاٽ ٽيلنٽ” 4 جولاءِ کان نشر ٿيڻ وارو آهي. شو هر هفتي ڇنڇر ۽ آچر تي جيو انٽرٽينمينٽ تان نشر ڪيو ويندو، جڏهن ته ان جي شروعاتي ٽريلر جاري ٿيڻ کان پوءِ شوبز جي حلقن ۽ سوشل ميڊيا تي وڏي دلچسپي ڏسڻ ۾ اچي رهي آهي.
شو جي ججن جي پينل ۾ پاڪستان جي مشهور اداڪارا مهوش حيات، گلوڪار علي ظفر، مزاحيه فنڪار تابش هاشمي ۽ ڪاروباري شخصيت عثمان بشير شامل آهن، جيڪي ملڪ جي مختلف علائقن مان ايندڙ مقابلي ڪندڙن جي صلاحيتن جو جائزو وٺندا.
انتظاميه موجب، هي پروگرام دنيا جي مشهور “گاٽ ٽيلنٽ” فارميٽ تي ٻڌل آهي، جيڪو 70 کان وڌيڪ ملڪن ۾ ڪاميابي سان پيش ڪيو ويو آهي. پاڪستان ۾ ان جو مقصد نوجوانن کي پنهنجي صلاحيتن جو اظهار ڪرڻ لاءِ هڪ قومي پليٽ فارم فراهم ڪرڻ آهي.
شو ۾ ڳائڻ، ناچ، جادوگري، مزاح، ايڪروبٽڪس، بيٽ باڪسنگ ۽ ٻين غيرمعمولي فنن سان واسطو رکندڙ ماڻهو حصو وٺي سگهندا. ملڪ جي مختلف شهرن مان آڊيشن پڻ منعقد ڪيا ويا، جن مان چونڊيل مقابلي ڪندڙ هاڻي ٽيليويزن تي پنهنجي صلاحيتن جو مظاهرو ڪندا.
شوبز ماهرن جو چوڻ آهي ته پاڪستان ۾ ريئلٽي شوز جي مقبوليت ۾ تيزي سان واڌ ٿي رهي آهي ۽ “پاڪستانز گاٽ ٽيلنٽ” نوجوان فنڪارن لاءِ نوان موقعا پيدا ڪندو. اميد ظاهر ڪئي پئي وڃي ته هي پروگرام ملڪ ۾ نون گلوڪارن، اداڪارن، مزاحيه فنڪارن ۽ ٻين باصلاحيت ماڻهن کي قومي ۽ عالمي سطح تي متعارف ڪرائڻ ۾ اهم ڪردار ادا ڪندو.
