July 27, 2025

عالمي مقابلن ۾ ميڊلز کٽيندڙ رانديگرن تي قسمت مهربان: پاڪستان اسپورٽس بورڊ انعامي رقم ۾ حيران ڪندڙ واڌ

راندين جي دنيا ۾ پاڪستان جو نالو روشن ڪندڙ پاڪستاني رانديگرن تي قسمت جي ديوي هڪ ڀيرو ٻيهر مهربان ٿي وئي آهي، پاڪستان اسپورٽس بورڊ وڏا اعلان ڪيا آهن.

پاڪستان اسپورٽس بورڊ انٽرنيشنل مقابلن ۾ ميڊلز کٽيندڙ رانديگرن جي انعامي رقم ۾ واڌ جو نه رڳو اعلان ڪريو پر فوري طور عملدرآمد به شروع ڪيو آهي.

ري وائيز ڪيش ايوارڊ پاليسي جاري

اسپورٽس بورڊ جي 34هين اجلاس ۾ اهم فيصلن جي منظوري ڏني وئي، جن ۾ رانديگرن جي انعامي رقم ۾ واڌ به شامل هئي، بورڊ جي منظوري کانپوءِ ري وائيز ڪيش ايوارڊ پاليسي جاري ڪئي وئي، اولمپڪس ۾ پاڪستان جي نمائندگي ڪندي گولڊ ميڊل کٽيندڙ رانديگرن لاءِ اڳ هڪ ڪروڙ روپيا انعامي رقم هئي، هاڻ اُن کي وڌائي 3 ڪروڙ روپيا ڪيو ويو آهي.

ري وائيز ڪيش ايوارڊ پاليسي تحت اولمپڪس ۾ سلور ميڊل کٽيندڙن جي رقم وڌائي وئي آهي، هاڻ رانديگرن کي سلور ميڊل کٽڻ تي 2 ڪروڙ روپيا ملندا، جڏهن ته برانز ميڊل کٽيندڙن رانديگر کي هڪ ڪروڙ روپيا انعام ملندو، ان کان اولمپڪس سلور ميڊل تي 75 لک ۽ برانز تي 50 لک انعام ملندو هو.

ايشين گيمز ۾ ميڊل جي انعامي رقم ۾ به واڌ

اسپورٽس بورڊ جي منظوري کانپوءِ ري وائيز پاليسي تحت ايشيائي رانديگرن لاءِ ايشين گيمز ۾ گولڊ ميڊل حاصل ڪرڻ تي 75 لک مان وڌائي هڪ ڪروڙ 50 لک روپيا ڪئي وئي آهي، ايشين گيمز ۾ سلور ميڊل کٽڻ تي انعامي رقم 70 لک ۽ برانز تي 50 لک روپيا انعام ملندو.

ڪامن ويلٿ گيمز ۾ گولڊ ميڊل جي انعامي رقم 50 لک مان وڌائي 75 لک ڪئي وئي آهي، جڏهن ته ڪامن ويلٿ ۾ سلور ڪيٽيگيري ۾ سلور ميڊلسٽ کي 50 لک ۽ برانز ميڊلسٽ کي 30 لک روپيا انعام ملندو.

نئين اسپورٽس پاليسي ٽن حصن ۾ ورهايل

نئين اسپورٽس پاليسي ۾ ورلڊ چيمپئن شپ کي ٽن حصن ۾ ورهايو ويو آهي، چئن سالن کانپوءِ ٿيندڙ ورلڊ چيمپئن شپ کٽڻ تي 75 لک انعام ڏنو ويندو، رانديگرن جي حوصلا افزائي ڪئي ويندي.

پاليسي ۾ ايشين چيمپئن شپ جي ايونٽس کي به ٽن مختلف ڪيٽيگريز ۾ ورهايو ويو آهي، ڪامن ويلٿ ۽ جونيئر سطح جي ايونٽس لاءِ به چيمپئن شپ جي مدي جي حساب سان انعام طئه ڪيا ويا آهن.