لاهور: پنجاب جي صوبائي گادي واري شهر جي مختلف علائقن ۾ تيز برسات ۽ ڳڙا پوڻ سبب گرمي جو زور ٽٽي ويو۔
لاهور جي مختلف علائقن گڙهي شاهو، مال روڊ، ايبٽ روڊ ۽ ڀرپاسي وارن علائقن ۾ ڪارا ڪڪر ڇانئجي ويا، برسات ۽ تيز هوائن سبب موسم خوشگوار ٿي ويو، جڏهن ته گرمي جي شدت ۾ گهٽتائي اچڻ تي شهرين سک جو ساهه کنيو۔
سڀ کان وڌيڪ برسات نشتر ٽائون ۾ 30 ملي ميٽر رڪارڊ ڪئي وئي، چوڪ ناخدا ۾ 24 ملي ميٽر ۽ گلبرگ ۾ 7 ملي ميٽر برسات ٿي۔ اهڙي طرح لکشمي چوڪ ۾ 26 ملي ميٽر، اپر مال تي 22 ملي ميٽر ۽ مغلپورا ۾ 23 ملي ميٽر برسات رڪارڊ ڪئي وئي۔
تاج پورا، گلشن راوي ۽ اقبال ٽائون وارن علائقن ۾ 17 ملي ميٽر برسات رڪارڊ ڪئي وئي، جڏهن ته برسات ۽ ڳڙا پوڻ سبب شهر جي مختلف علائقن ۾ ٽرئفڪ جي رواني پڻ متاثر ٿي۔
هوڏانهن لاهور جي علائقي واپڊا ٽائون ۾ طوفان ۽ برسات سبب هڪ ڀت رڪشي تي ڪري پئي، جنهن جي نتيجي ۾ 2 ڄڻا زخمي ٿي پيا، جن کي ريسڪيو 1122 ذريعي جناح اسپتال منتقل ڪيو ويو۔
ٻئي طرف برسات سبب ليسڪو جا 50 کان وڌيڪ فيڊر ٽرپ ٿي ويا، فيڊر ٽرپ ٿيڻ ۽ ٻين فني خرابين سبب ڪيترن ئي علائقن ۾ بجلي بند ٿي وئي، جنهن ڪري شهرين کي پريشاني کي منهن ڏيڻو پيو۔
ليسڪو جي چيف ايگزيڪيوٽو چيو آهي ته برسات بند ٿيندي ئي فيڊرن جي بحالي جو ڪم شروع ڪيو ويندو، هن وقت ليسڪو ريجن ۾ بجلي جي فراهمي طلب مطابق آهي۔
