برسلر: يورپي يونين يوڪرين لاءِ 90 بلين يورو جو قرض ۽ روس جي خلاف پابندين جي 20ھين پئڪيج جي باضابطھ طور تي منظوري ڏئي ڇڏي.
انھن ٻنھي قدمن کي پھريان ھنگري بلاڪ ڪري ڇڏيو ھو جڏھن تھ يورپي يونين جي سفيرن ٻنھي قدمن جي منظوري پھريان ئي ڏئي ڇڏي ھئي.
ان کانپوءِ فيصلھ سازي جي عمل کي حتمي شڪل ڏيڻ لاءِ ھڪ تحريري طريقيڪار شروع ڪيو ويو جنھن ۾ ميمبر ملڪن جي اعتراض اٿارڻ لاءِ آخري تاريخ ڏني وئي، پر ڪنھن بھ ملڪ ان کي روڪڻ جي ڪوشش نھ ڪئي ۽ قرض توڙي پابندين جو پئڪيج ٻئي متفقھ طور تي منظور ڪيا ويا.
اھا اڳڀرائي تازو ئي ھنگري ۾ سياسي تبديلي کانپوءِ ممڪن ٿي آھي، ھنگري جي اڳوڻي وزيراعظم وڪٽر اوربان ڊرزھيا پائپ لائن جي ذريعي ھنگري ۽ سلوواڪيھ کي روسي تيل جي سپلاءِ جي معطلي جو حوالو ڏيندي 90 بلين يورو جي قرض کي روڪي ڇڏيو ھو، جنھن کي ھاڻ ٻيھر شروع ڪيو ويو آھي.
ھاڻ منظور ٿيل بجيٽ ۾ گھربل ترميم سان، ڪميشن مالياتي مارڪيٽن مان قرض وٺڻ ۽ ان جي ٽھ ماھي جي اختتام کان پھريان يوڪرين کي قرض جي پھرين قسط ادا ڪرڻ لاءِ بجيٽ کي ضامن جي طور تي استعمال ڪري سگھي ٿو.
يورپي يونين جو منصوبو آھي تھ 2026 ۽ 2027 ٻنھي ۾ دفاعي ۽ بجيٽ جي لاءِ 45 بلين يورو فراھم ڪري.
يورپي ڪائونسل جي صدر انتونيو ڪوسٽا ۽ يورپي ڪميشن جي صدر ارسولا وان ڊير ليين ٻنھي ان فيصلي کي ڀليڪار ڪيو، وان ڊير ليين چيو تھ ھاڻ اسان ٻنھي محاذن تي تيزي سان ڪم ڪنداسين.
