اسلام آباد (مانيٽرنگ ڊيسڪ) وزيراعظم جي سياسي معاملن بابت صلاحڪار سينيٽر راڻا ثناءُ الله چيو آهي ته وزيراعظم شهباز شريف ملڪ ۾ دهشتگردي جي خاتمي لاءِ سڀني سياسي پارٽين سان گڏ ويهي ڳالهين ڪرڻ لاءِ تيار آهي، سياسي جماعتون گڏجي دهشتگردي جي مسئلي جو حل ڳولين.
سينيٽ اجلاس ۾ خيالن جو اظهار ڪندي راڻا ثناءُ الله چيو ته هو سڀني سياسي پارٽين کي دعوت ڏئي ٿو ته اهي وزيراعظم سان گڏ ويهي دهشتگردي جي معاملي تي تفصيلي ڳالهه ٻولهه ڪن.
هن چيو ته خيبرپختونخوا ۾ دهشتگردي جي صورتحال بابت صوبائي حڪومت جو وفاق سان گهربل سهڪار نه ملي رهيو هو، جڏهن ته بلوچستان جي صوبائي حڪومت وفاق سان مڪمل سهڪار ڪري رهي آهي.
راڻا ثناءُ الله وڌيڪ چيو ته وزيراعظم اڄ به دهشتگردي جي معاملي تي سڀني سياسي پارٽين سان ڳالهين لاءِ تيار آهي. هن چيو ته ملڪ هن وقت دهشتگردي کي منهن ڏئي رهيو آهي ۽ تازو ئي هڪ ميجر پڻ شهيد ٿيو آهي.
اپوزيشن بابت ڳالهائيندي هن چيو ته قومي اسيمبلي جي اپوزيشن ليڊر محمود اچڪزئي اسپيڪر جي صحيح سان عهدي تي مقرر ٿيو آهي، پر هو اسپيڪر چيمبر ۾ وڃڻ لاءِ تيار ناهي. راڻا ثناءُ الله موجب، هن پاڻ محمود اچڪزئي سان ملاقات ڪري کيس ضد ڇڏي وزيراعظم سان ملڻ جي صلاح ڏني.
هن دعويٰ ڪئي ته اپوزيشن جا نمائندا ايپڪس ڪميٽي جي اجلاسن ۾ شرڪت نٿا ڪن، جڏهن ته انهن اجلاسن ۾ کليل نموني ڳالهه ٻولهه ٿيندي آهي.
راڻا ثناءُ الله وڌيڪ چيو ته ملاقاتن دوران ڪجهه ماڻهو ادارن خلاف بيانيو ٺاهين ٿا ۽ گارگند ڪن ٿا، جنهن سبب ضابطن ۽ قانونن تحت ملاقاتن تي پابنديون لڳي سگهن ٿيون.
