خيبر: پاڪستاني سيڪيورٽي فورسز خيبر ضلعي ۾ انٽيليجنس بنيادن تي ڪامياب آپريشن ڪندي 22 شدت پسندن کي مارڻ جي دعويٰ ڪئي آهي، جڏهن ته ڪارروائي دوران فائرنگ جي ڏي وٺ ۾ هڪ 10 ورهين جو ٻار پڻ حياتي وڃائي ويٺو.
پاڪستاني فوج جي شعبي آءِ ايس پي آر موجب، 21 اپريل 2026 تي خيبر ضلعي ۾ شدت پسندن جي موجودگي بابت اطلاع مليو، جنهن تي سيڪيورٽي فورسز فوري طور آپريشن شروع ڪيو.
بيان ۾ چيو ويو آهي ته آپريشن دوران سيڪيورٽي فورسز ۽ شدت پسندن وچ ۾ سخت فائرنگ جي ڏي وٺ ٿي. شدت پسندن طرفان انڌا ڌند فائرنگ ڪئي وئي، جنهن جي نتيجي ۾ هڪ معصوم 10 سالن جو ٻار مارجي ويو.
آءِ ايس پي آر مطابق، مارجي ويل شدت پسند علائقي ۾ مختلف دهشتگرد ڪاررواين ۾ سرگرم هئا، ۽ سندن قبضي مان وڏي مقدار ۾ هٿيار ۽ گولا بارود پڻ هٿ ڪيو ويو آهي.
فوجي ترجمان موجب، علائقي ۾ وڌيڪ شدت پسندن جي موجودگي جي خدشي سبب ڪليئرنس آپريشن اڃا جاري آهي ته جيئن علائقي کي مڪمل طور محفوظ بڻايو وڃي.
ٻئي طرف محسن نقوي فائرنگ دوران فوت ٿيل ٻار جي وارثن سان دلي همدردي ۽ تعزيت جو اظهار ڪيو آهي، ۽ چيو آهي ته بيگناهه جانين جو نقصان انتهائي ڏکوئيندڙ آهي.
خيبر ۾ هي آپريشن دهشتگردن خلاف سيڪيورٽي فورسز جي جاري مهم جو حصو آهي، پر معصوم ٻار جي موت هڪ ڀيرو ٻيهر اهڙين ڪاررواين جي انساني قيمت تي سنجيده سوال اٿاري ڇڏيا آهن.
