ڪراچي: (ويب ڊيسڪ) سامونڊي جھاز آنر 25 تي صومالي قذاقن جي قبضي کانپوءِ 11 پاڪستاني يرغمال آھن، جن جي وارثن حڪومت کان فوري مدد جو مطالبو ڪيو آھي.
متاثر خاندانن جو چوڻ آھي تھ قذاقن جي قبضي کانپوءِ رابطو ختم ٿي چڪو آھي، جھاز عمان کان فجيرھ وڃي رھيو ھو، رستي ۾ اغوا ٿيو، حڪومت طرفان اڃا تائين ڪا بھ مدد ناھي ملي، سنڌ جي گورنر فون تي رابطو ڪري تعاون جو يقين ڏياريو.
مغوين جي وارثن ٻڌايو تھ امن شمس ٻن ٻارڙن جو پيءُ آھي، سندس ٽن سالن جي ڌيءَ ۽ چئن مھينن جو پٽ آھي، مغوي سيد ڪاشف چئن ٻارن جو والد آھي، مغوي عمران جون ٻھ نياڻيون جڏھن تھ حسين جا 3 ٻار آھن، مغوي جو 9 سالن جو ٻار شبير بھ والد جي آمد جو منتظر آھي.
ياد رھي تھ آنر 25 نالي جھاز تي سامونڊي قذاقن 21 اپريل تي حملو ڪيو ۽ ان کي قبضي ۾ وٺي ڇڏيو، جھاز جي عملي ۾ 11 پاڪستاني بھ شامل آھن.
ذريعن جو چوڻ آھي تھ سامونڊي معاملن واري وزارت جي ڊائريڪٽوريٽ آف پورٽ جو پاڪستاني ڪريو سان رابطو نھ ٿي سگھيو جڏھن تھ جھاز تي پھچندڙ ايجنسي بھ خاموش آھي.
متاثر خاندان ٻڌايو تھ انڊونيشين ڪيپٽن جي آزادي لاءِ انڊونيشيا قذاقن سان ڳالھھ ٻولھھ ڪري رھيو آھي، حڪومت کان مطالبو آھي تھ پاڪستاني عملي جي حفاظت سان واپسي لاءِ فوري قدم کنيا وڃن.
