ممبئي (ويب ڊيسڪ): بالي ووڊ اداڪار ارشد وارثي اداڪارا ڪنگنا رناوت جي فلم انڊسٽري ۾ اقربا پروري (نيپوزم) بابت موقف تي ردعمل ڏيندي چيو آهي ته فلمي پسمنظر رکندڙ اداڪارن جي ٻارن لاءِ به ڪاميابي حاصل ڪرڻ ايترو آسان ناهي هوندو.
فلم ’منا ڀائي ايم بي بي ايس‘ جي اداڪار ارشد وارثي هڪ پوڊڪاسٽ ۾ فلم انڊسٽري سان لاڳاپيل معاملن تي ڳالهائيندي چيو ته آخرڪار ڪنهن به فنڪار جي ڪاميابي جو اصل معيار سندس صلاحيت ۽ ٽيلنٽ هوندو آهي.
ارشد وارثي چيو ته ڪنگنا رناوت جڏهن فلم انڊسٽري ۾ اقربا پروري جو معاملو اٿاريو ته ان تي ڪافي بحث شروع ٿيو، پر کيس ان معاملي تي ڪا خاص پريشاني ناهي، ڇاڪاڻ ته آخرڪار هڪ انسان ڪيترو اڳتي وڌندو، ان جو فيصلو سندس ٽيلنٽ ڪندو آهي.
هن چيو ته هو چاهي ٿو ته سندس ٻار به پنهنجي الڳ سڃاڻپ ۽ پنهنجو رستو ٺاهين، پر اسٽار ڪڊز لاءِ ماڻهن جون اميدون پوريون ڪرڻ آسان ناهي هوندو.
ارشد وارثي موجب ماڻهن جو عام تاثر هوندو آهي ته جيڪڏهن ڪو شخص ڪنهن مشهور اداڪار جو ٻار آهي ته اهو لازمي طور تي سٺو اداڪار به هوندو، جڏهن ته هر انسان جي پنهنجي شخصيت، صلاحيت ۽ قابليت هوندي آهي.
هن وڌيڪ چيو ته اسٽار ڪڊز کان تمام گهڻيون اميدون وابسته ڪيون وينديون آهن ۽ انهن کي ڪيترن ئي ماڻهن جي اميدن تي پورو لهڻو پوندو آهي، جيڪو هر صورت ۾ منصفاڻو ناهي.
اداڪار جو چوڻ هو ته فلمي پسمنظر رکندڙ شخص لاءِ وڌ ۾ وڌ اهو ٿي سگهي ٿو ته ڪاميابي جو هڪ دروازو ٻين جي ڀيٽ ۾ ڪجهه جلدي کلي وڃي، پر جيڪڏهن ان شخص ۾ ٽيلنٽ نه هجي ته اهو دروازو به جلدي بند ٿي سگهي ٿو.
واضح رهي ته ڪنگنا رناوت فلمساز ڪرن جوهر جي شو ’ڪافي ود ڪرن‘ ۾ شرڪت دوران بالي ووڊ ۾ اقربا پروري بابت کليل نموني ڳالهائيندي ڪرن جوهر کي نيپوزم جو علمبردار قرار ڏنو هو، جنهن کانپوءِ بالي ووڊ ۾ ’نيپوزم‘ بابت بحث وڌيڪ شدت اختيار ڪري ويو هو.
