اسلام آباد: آءِ ايم ايف پروگرام سبب ملڪي ترقياتي بجيٽ متاثر، فنڊن جي استعمال ۾ وڏي گهٽتائي جو انڪشاف
آءِ ايم ايف پروگرام جون سخت پابنديون هجڻ سبب ترقياتي بجيٽ سڀ کان وڌيڪ متاثر ٿي آهي، ڇو ته هاڻي تائين ترقياتي منصوبن لاءِ مختص ڪيل ھڪ هزار ارب رپين مان صرف 528 ارب رپيا ئي استعمال ٿي سگهيا آهن۔
منصوبابندي واري وزير احسن اقبال جي صدارت هيٺ سومر ڏينهن اينوئل پلان ڪوآرڊينيشن ڪميٽي آڏو پيش ڪيل ورڪنگ پيپر موجب حڪومت پبلڪ سيڪٽر ڊولپمينٽ پروگرام جي مد ۾ 1000 ارب رپيا مختص ڪيا هئا، جن مان وزارتن، ڊويزنن ۽ انتظامي ادارن جولاءِ 2025 کان 25 مئي 2026 تائين 528 ارب رپيا استعمال ڪيا آهن۔
سالياڻي پلان ڪوآرڊينيشن ڪميٽي جي اجلاس کي خطاب ڪندي احسن اقبال چيو ته پاڪستان ۾ ترقياتي منصوبن لاءِ رقم ۾ مسلسل گهٽتائي ٿي رهي آهي ۽ سيڙپڪاري (انويسٽمينٽ) جي ڊي پي جي 2.6 سيڪڙو مان گهٽجي 0.6 سيڪڙو ٿي وئي آهي۔
هن چيو ته 5 هزار ارب رپين جي منصوبن جي PC-I تي ڪم هلي رهيو آهي، جڏهن ته ترقياتي منصوبا مڪمل ڪرڻ لاءِ 10 هزار ارب رپيا گهربل آهن۔ هن وڌيڪ چيو ته مالي سال 2018 کان پوءِ ترقياتي منصوبن لاءِ وسيلن ۾ لاڳيتو گهٽتائي ٿي آهي، جڏهن ته ترقياتي بجيٽ جي حوالي سان صوبا امير ٿي ويا آهن، ڇو ته صوبن جو ترقياتي بجيٽ وڌي ويو آهي۔
وفاقي وزير جو چوڻ هو ته ايندڙ مالي سال لاءِ وزارتن منصوبن لاءِ 3 هزار ارب رپيا گهريا هئا، پر وفاقي ترقياتي پروگرام 2018 جي هڪ هزار ارب رپين جي سطح تي ئي بيٺل آهي۔ هن چيو ته اهڙي صورتحال ۾ رڳو چونڊيل منصوبن تي ڪم ڪري سگهجي ٿو۔
