لاهور: (بيورورپورٽ) پنجاب جي وڏي وزير مريم نواز شريف صوبائي ڪابينا جي بجيٽ اجلاس ۾ خطاب ڪندي نئين مالي سال 2026-27 جي صوبائي بجيٽ جي منظوري ڏئي ڇڏي آهي. ڪابينا پاران به اڳواٽ ٿيل خاص اجلاس ۾ بجيٽ دستاويزن جي باضابطه منظوري ڏني وئي.
وزيراعليٰ مريم نواز شريف بجيٽ 2026-27 جي دستاويزن تي دستخط ڪندي ان کي باضابطه طور منظور ڪيو. ان موقعي تي سڄي صوبائي قيادت ۽ لاڳاپيل کاتن جا اعليٰ عملدار موجود هئا.
وزيراعليٰ اجلاس دوران سينيئر وزير مريم اورنگزيب، صوبائي وزير خزانه مجتبيٰ شجاع الرحمان ۽ وزير اطلاعات عظميٰ زاهد بخاري سميت پوري ٽيم جي ڪارڪردگي کي ساراهيو.
هن چيو ته چيف سيڪريٽري زاهد اختر زمان، سيڪريٽري فنانس مجاهد شير دل ۽ سڄي انتظامي ٽيم بجيٽ تي گڏجي “ون يونٽ” طور ڪم ڪيو آهي.
مريم نواز شريف پنجاب ريونيو اٿارٽي کي هدايت ڪئي ته ريونيو وڌائڻ لاءِ وڌيڪ موثر قدم کنيا وڃن، جيئن صوبائي آمدني ۾ بهتري اچي سگهي.
وزيراعليٰ چيو ته مالي مشڪلاتن ۽ عالمي حالتن باوجود عوام تي نوان ٽيڪس نه لڳايا ويا، بجيٽ مڪمل طور تي عوامي رليف ۽ ترقي تي مرڪوز آهي. وفاق کي حصو ڏيڻ جي باوجود ڪوشش ڪئي وئي ته عوام تي بوجھ گهٽ رکي سگهجي.
هن وڌيڪ چيو ته هي بجيٽ “اميد جو بجيٽ” آهي ۽ حڪومت پنهنجي وسيلن سان عوام کي رليف فراهم ڪرڻ لاءِ پرعزم آهي.
مريم نواز شريف چيو ته اميد آهي ته حڪومت گذريل سالن وانگر هن سال به عوام جي اميدن تي پورو لهندي. هن دعا ڪئي ته الله تعاليٰ کين صدق دل سان عوام جي خدمت ڪرڻ جي توفيق ڏئي.
پنجاب حڪومت جو نئون بجيٽ 2026-27 باضابطه طور منظور ٿيڻ بعد هاڻي عملدرآمد واري مرحلي ڏانهن وڌي ويو آهي، جنهن کي حڪومت “عوام دوست ۽ رليف تي ٻڌل بجيٽ” قرار ڏئي رهي آهي۔
