سيالڪوٽ (ويب ڊيسڪ): بچاءَ واري وفاقي وزير خواجا آصف پاڪستان انسٽيٽيوٽ آف ميڊيڪل سائنسز (پمز) ۾ پيش آيل واقعي کي ڪرپشن سان ڳنڍيندي چيو آهي ته پمز ۾ جيڪو ڪجهه ٿيو، اهو صرف ۽ صرف ڪرپشن سبب ٿيو ۽ اهو خطري جي گهنٽي آهي. هن صحت جي شعبي ۾ مبينا ڪرپشن تي سخت ڳڻتي جو اظهار ڪندي چيو ته هن شعبي ۾ جيتري ”لوٽ مار“ آهي، اها شايد ڪنهن ٻئي شعبي ۾ نه هجي.
سيالڪوٽ ۾ هڪ تقريب کي خطاب ڪندي خواجا آصف چيو ته پمز ۾ هڪ وڏو سانحو پيش آيو، جنهن جو وزيراعظم پڻ نوٽيس ورتو آهي.
هن دعويٰ ڪئي ته پمز ۾ پيش آيل واقعي جي بنيادي سببن مان هڪ ڪرپشن آهي ۽ اهڙو واقعو ادارن جي ڪارڪردگي بابت سنجيده سوال اٿاري ٿو.
خواجا آصف ان صورتحال کي ”خطري جي گهنٽي“ قرار ڏيندي چيو ته ڪرپشن کي نظرانداز ڪرڻ سان مسئلا وڌيڪ سنگين ٿي سگهن ٿا.
وفاقي وزير چيو ته صحت جي شعبي ۾ وڏي پيماني تي مبينا ڪرپشن موجود آهي.
سندس چوڻ هو ته صحت جهڙي اهم شعبي ۾ ٿيندڙ بدعنواني جو سڌو اثر عام ماڻهن تي پوي ٿو، ڇاڪاڻ ته عوام علاج ۽ طبي سهولتن لاءِ سرڪاري ادارن تي ڀاڙيندو آهي.
هن ڪرپشن کي اهڙو ”ناسور“ قرار ڏنو، جيڪو هاڻي وڏي پيماني تي پکڙجي چڪو آهي.
خواجا آصف موجب اينٽي ڪرپشن ادارن منظم طريقي سان ڪرپشن ۾ ملوث ماڻهن خلاف ڪارروائي شروع ڪئي آهي.
هن چيو ته ڪرپشن خلاف ڪارروائي کي وڌيڪ مؤثر بڻائڻ ۽ بدعنوان عنصرن خلاف قانوني قدم کڻڻ ضروري آهي، جيئن سرڪاري ادارن ۾ شفافيت ۽ ذميواري جو نظام مضبوط ٿي سگهي.
تقريب دوران خواجا آصف سيالڪوٽ جي صنعتي شعبي ۽ مزدورن بابت پڻ ڳالهائيندي چيو ته فيڪٽري ورڪرن لاءِ سوشل سيڪيورٽي اسپتالن ۾ جديد طبي سهولتون فراهم ڪيون ويون آهن.
هن چيو ته سيالڪوٽ جي صنعت سان لکين مزدور لاڳاپيل آهن، جڏهن ته شهر پنهنجي مصنوعات جي ڪري ملڪ اندر ۽ عالمي سطح تي اهم حيثيت رکي ٿو.
وفاقي وزير پنجاب جي وزيراعليٰ مريم نواز پاران شروع ڪيل مختلف قدمن جي واکاڻ پڻ ڪئي.
خواجا آصف چيو ته مريم نواز جيڪو سلسلو شروع ڪيو آهي، اهو عوام جي بهتري لاءِ آهي ۽ اهڙن قدمن جو مقصد عام ماڻهن کي وڌيڪ سهولتون فراهم ڪرڻ ۽ انهن جي مسئلن کي حل ڪرڻ آهي.
هن زور ڏنو ته عوامي ڀلائي لاءِ شروع ڪيل منصوبن سان گڏ ادارن ۾ شفافيت ۽ ڪرپشن خلاف مؤثر ڪارروائي پڻ ضروري آهي.
