اسلام آباد (بيورو رپورٽ): وفاقي گادي واري شهر اسلام آباد ۾ تيز هوائن سان گڏ گجگوڙ سان برسات سبب مختلف علائقن ۾ روڊن ۽ گهٽين تي پاڻي جمع ٿي ويو.
مسلسل ٻن ڏينهن جي برسات کانپوءِ اسلام آباد ۾ اڄ رات ٻيهر تيز برسات پئي، جنهن سبب شهر جي مختلف علائقن ۾ پاڻي بيهجي ويو. ان کان علاوه مالاڪنڊ ۽ ڀرپاسي وارن علائقن ۾ پڻ برسات جا اطلاع آهن.
موسميات کاتي موجب اسلام آباد، راولپنڊي، اٽڪ، چڪوال ۽ جهلم ۾ 5 سيپٽمبر تائين تيز برساتن جو امڪان آهي، جنهن سبب لاڳاپيل ادارن کي احتياط ڪرڻ جي هدايت ڪئي وئي آهي.
ياد رهي ته اڱاري ڏينهن راولپنڊي ۾ 230 ملي ميٽر برسات رڪارڊ ڪئي وئي هئي، جنهن کانپوءِ شهر جون گهٽيون ۽ روڊ ندي نالن جو منظر پيش ڪرڻ لڳا هئا.
تيز برسات سبب ڪيترائي گاڏيون پاڻي ۾ ڦاسي ويون ۽ هيٺاهين وارن علائقن ۾ برساتي پاڻي گهرن اندر داخل ٿي ويو هو.
اربع ڏينهن پڻ اسلام آباد ۽ راولپنڊي ۾ تيز برسات سبب سمورن لاڳاپيل ادارن کي هاءِ الرٽ رهڻ جي هدايت ڪئي وئي هئي.
انتظاميا طرفان برسات دوران شهرين کي غيرضروري سفر کان پاسو ڪرڻ ۽ هيٺاهين وارن علائقن ۾ خاص احتياط ڪرڻ جي هدايت ڪئي وئي آهي.
تيز برساتن جي نئين سلسلي سبب اسلام آباد، راولپنڊي ۽ ڀرپاسي وارن علائقن ۾ شهري ٻوڏ جو خطرو برقرار آهي.
