ڪراچي: (ڪرائيم رپورٽر) ڪراچي جي هڪ عدالت جوابداره انمول عرف پنڪي کي جيل ۾ ڪپڙا ۽ دوائون فراهم نه ڪرڻ بابت داخل ڪيل شڪايت تي عورتن جي جيل جي سپرنٽنڊنٽ کي طلب ڪري ورتو آهي.
عدالت ۾ ٻڌڻي دوران جوابداره جي وڪيل موقف اختيار ڪيو ته انمول عرف پنڪي کي جيل ۾ ضروري ڪپڙا ۽ علاج لاءِ گهربل دوائون مهيا نٿيون ڪيون وڃن، جنهن سبب سندس بنيادي حق متاثر ٿي رهيا آهن. وڪيل عدالت کان مطالبو ڪيو ته جيل انتظاميا کي فوري طور گهربل سهولتون فراهم ڪرڻ جا حڪم ڏنا وڃن.
عدالت شڪايت کي سنجيدگي سان وٺندي عورتن جي جيل جي سپرنٽنڊنٽ کي ايندڙ ٻڌڻي تي ذاتي حيثيت ۾ پيش ٿيڻ ۽ ان سلسلي ۾ تفصيلي رپورٽ جمع ڪرائڻ جو حڪم ڏنو.
عدالت پنهنجي ريمارڪس ۾ چيو ته جيڪڏهن ڪنهن به قيدي يا جوابدار کي قانون موجب مليل بنيادي سهولتن کان محروم رکيو ويو آهي ته ان بابت واضح وضاحت پيش ڪئي وڃي. عدالت وڌيڪ هدايت ڪئي ته جوابداره جي صحت ۽ ٻين بنيادي ضرورتن بابت مڪمل رڪارڊ پڻ پيش ڪيو وڃي.
ٻئي طرف جيل انتظاميا جو موقف عدالت ۾ رپورٽ پيش ٿيڻ کان پوءِ سامهون ايندو. عدالت ڪيس جي وڌيڪ ٻڌڻي ايندڙ تاريخ تائين ملتوي ڪري ڇڏي.
