ڪراچي: (رپورٽر) اينٽي ڪرپشن عدالت 8 ارب رپين کان وڌيڪ مبينا ڪرپشن واري ڪيس ۾ گرفتار جوابدار ضمير عباسي جي ضمانت واري درخواست رد ڪري ڇڏي.
عدالت ۾ ٻڌڻي دوران جاچ اداري جي نمائندن موقف اختيار ڪيو ته جوابدار خلاف وڏي پيماني تي مالي بي ضابطگين جا الزام آهن ۽ جاچ اڃا جاري آهي، تنهن ڪري هن مرحلي تي ضمانت ڏيڻ سان جاچ متاثر ٿيڻ جو امڪان آهي. پراسيڪيوشن عدالت کي ٻڌايو ته ڪيس ۾ دستاويزي ثبوت، مالي رڪارڊ ۽ ٻين شاهدين جو جائزو ورتو پيو وڃي.
ٻئي طرف جوابدار جي وڪيل دليل ڏنا ته ضمير عباسي بيگناهه آهي، سندس موڪل ڪنهن به قسم جي ڪرپشن ۾ ملوث ناهي ۽ کيس قانون موجب ضمانت ڏيڻ گهرجي. وڪيل عدالت کان درخواست ڪئي ته جاچ سان سهڪار ڪرڻ جي يقين ڏيارڻ تي ضمانت منظور ڪئي وڃي.
ڌرين جا دليل ٻڌڻ کان پوءِ اينٽي ڪرپشن عدالت فيصلو ٻڌائيندي ضمير عباسي جي ضمانت واري درخواست رد ڪري ڇڏي. عدالت قرار ڏنو ته ڪيس جي نوعيت، الزام جي سنگيني ۽ جاچ جي موجوده مرحلي کي نظر ۾ رکندي هن وقت ضمانت ڏيڻ مناسب ناهي.
واضح رهي ته ضمير عباسي کي ييلو لائين بي آر ٽي (Yellow Line BRT) منصوبي ۾ مبينا طور 8 ارب رپين کان وڌيڪ مالي بي ضابطگين ۽ ڪرپشن جي الزام هيٺ گرفتار ڪيو ويو آهي. اينٽي ڪرپشن اختيارين موجب منصوبي سان لاڳاپيل مالي معاملن، ٺيڪن ۽ ادائگين جي مختلف رخن کان جاچ جاري آهي.
عدالتي فيصلي کان پوءِ ضمير عباسي عدالتي ريمانڊ تي جيل ۾ رهندو، جڏهن ته جاچ اداري کي ڪيس جي وڌيڪ جاچ جاري رکڻ جي هدايت ڪئي وئي آهي. ڪيس جي ايندڙ ٻڌڻي مقرر تاريخ تي ٿيندي، جتي جاچ جي اڳڀرائي بابت رپورٽ پڻ عدالت ۾ پيش ڪئي ويندي.
