ٻٻرلوءِ ( نمائندو ڊبليو ٽي اين ): خيرپور ضلعي جي ٻٻرلو باءِ پاس تي نينگري پريا ڪماري ۽ سنڌ جي ٻين گم ٿيل ٻارن جي بازيابي لاءِ لڳل ڌرڻو ڪيترن ئي ڏينهن کان جاري آهي. ڌرڻي سبب سنڌ ۽ پنجاب کي ملائيندڙ قومي شاهراهه تي ٽرئفڪ سخت متاثر ٿي رهي آهي، جنهن ڪري مسافرن، واپارين ۽ ٽرانسپورٽرن کي ڏکيائين کي منهن ڏيڻو پئجي رهيو آهي.
ڌرڻي ۾ پريا ڪماري جي وارثن، سماجي ڪارڪنن، انساني حقن جي تنظيمن، قومپرست سياسي پارٽين، وڪيلن، شاگرد تنظيمن ۽ سول سوسائٽي جي نمائندن وڏي انگ ۾ شرڪت ڪئي آهي. احتجاج ڪندڙن جو مطالبو آهي ته رڳو پريا ڪماري نه، پر سنڌ مان گم ٿيل سڀني ٻارن کي بازياب ڪرايو وڃي، اغوا ڪندڙن کي گرفتار ڪري قانون موجب سخت سزا ڏني وڃي ۽ مستقبل ۾ اهڙن واقعن جي روڪٿام لاءِ اثرائتا قدم کنيا وڃن.
ڌرڻي دوران مختلف سياسي ۽ سماجي اڳواڻن به شرڪت ڪري احتجاج ڪندڙن سان يڪجهتي جو اظهار ڪيو. ڪيترن ئي اڳواڻن حڪومت تي تنقيد ڪندي چيو ته ٻارن جي گمشدگي جا واقعا قانون لاڳو ڪندڙ ادارن جي ڪارڪردگي تي وڏو سوال آهن، جڏهن ته حڪومت کي رڳو بيانن بدران عملي نتيجا ڏيکارڻ گهرجن.
ٻئي طرف سنڌ حڪومت پاران احتجاج ختم ڪرائڻ لاءِ ڪيترائي وفد ڌرڻي واري هنڌ موڪليا ويا. صوبائي وزيرن، چونڊيل نمائندن ۽ ضلعي انتظاميا احتجاج ڪندڙن سان ڳالهيون ڪيون، پر احتجاج ڪندڙن واضح ڪيو ته جيستائين پريا ڪماري ۽ ٻين گم ٿيل ٻارن جي بازيابي بابت واضح ۽ عملي اڳڀرائي نه ٿيندي، تيستائين ڌرڻو ختم نه ڪيو ويندو.
حڪومت جو موقف آهي ته پريا ڪماري سميت ٻين گم ٿيل ٻارن جي ڳولا لاءِ پوليس ۽ قانون لاڳو ڪندڙ ادارا سرگرم آهن، مختلف علائقن ۾ ڇاپا هنيا پيا وڃن ۽ جاچ جو دائرو وڌايو ويو آهي. حڪومت جو چوڻ آهي ته ڪيس کي ترجيحي بنيادن تي ڏٺو پيو وڃي ۽ جلد مثبت اڳڀرائي جي اميد آهي، جڏهن ته احتجاج ڪندڙن کان به شاهراهه کولڻ جي اپيل ڪئي وئي آهي ته جيئن عام ماڻهن کي تڪليف نه ٿئي.
هوڏانهن ڌرڻي سبب سنڌ ۽ پنجاب وچ ۾ مال بردار ٽرڪن، مسافر گاڏين ۽ ٻين ٽرانسپورٽ جي ڊگهيون قطارون لڳي ويون آهن. ڪيترن ئي مسافرن کي متبادل رستا اختيار ڪرڻا پيا، جڏهن ته واپاري حلقن جو چوڻ آهي ته شاهراهه بند هجڻ سبب سامان جي آمدرفت متاثر ٿي رهي آهي.
انساني حقن جي تنظيمن جو چوڻ آهي ته سنڌ ۾ ٻارن جي گمشدگي جا واقعا انتهائي ڳڻتي جوڳا آهن ۽ حڪومت کي مستقل پاليسي جوڙي اهڙن ڪيسن جي تيز جاچ، جديد ٽيڪنالاجي جي استعمال ۽ متاثر خاندانن کي قانوني ۽ نفسياتي سهائتا فراهم ڪرڻ گهرجي.
پريا ڪماري، جيڪا 2022ع ۾ خيرپور مان گم ٿي هئي، اڃا تائين بازياب نه ٿي سگهي آهي. سندس ڪيس سنڌ جي سڀ کان وڌيڪ بحث هيٺ آيل ٻارن جي گمشدگي وارن ڪيسن مان هڪ بڻجي چڪو آهي، ۽ ان جي بازيابي لاءِ وقت بوقت مختلف شهرن ۾ احتجاج ٿيندا رهيا آهن.
