اسلام آباد: (بيورورپورٽ) اسٽيبلشمينٽ ڊويزن پاڪستان ايڊمنسٽريٽو سروس (PAS) جي گريڊ 21 جي آفيسرن جي عبوري سينيارٽي لسٽ جاري ڪري ڇڏي آهي، جيڪا بيوروڪريسي لاءِ هڪ اهم اڳڀرائي سمجهي پئي وڃي.
جاري ڪيل عبوري لسٽ موجب مجموعي طور 82 آفيسرن جا نالا شامل ڪيا ويا آهن، جڏهن ته ارم بخاري کي گريڊ 21 جي سڀ کان سينيئر آفيسر قرار ڏنو ويو آهي.
عبوري سينيارٽي لسٽ جي جاري ٿيڻ سان وفاقي بيوروڪريسي ۾ ايندڙ ترقيين، اهم مقررين ۽ اعليٰ انتظامي عهدن تي مقرريءَ جي عمل ۾ اهميت پيدا ٿيندي، ڇاڪاڻ ته سينيارٽي سرڪاري خدمتن ۾ ترقي ۽ ذميوارين جي ورهاست جو بنيادي معيار هوندي آهي.
اسٽيبلشمينٽ ڊويزن موجب اها لسٽ عبوري بنيادن تي جاري ڪئي وئي آهي. جيڪڏهن ڪنهن آفيسر کي پنهنجي سينيارٽي بابت ڪو اعتراض يا دعويٰ هجي ته هو مقرر ڪيل ضابطن ۽ مدي اندر پنهنجو اعتراض جمع ڪرائي سگهي ٿو، جنهن کان پوءِ اعتراضن جو جائزو وٺي حتمي سينيارٽي لسٽ جاري ڪئي ويندي.
انتظامي ماهرن جو چوڻ آهي ته عبوري سينيارٽي لسٽ جي اشاعت سان اعليٰ سرڪاري آفيسرن جي سروس رڪارڊ ۾ شفافيت ايندي ۽ مستقبل جي ترقيين ۽ مقررين بابت موجود غيريقيني صورتحال ۾ به گهٽتائي ايندي.
