نيويارڪ: گڏيل قومن ۾ ايران جي سفير امير سعيد ايرواني اسرائيل پاران ايران جي سپريم ليڊر مجتبيٰ خامنه اي کي قتل ڪرڻ بابت تازي ڌمڪي خلاف گڏيل قومن ۾ باضابطه احتجاج رڪارڊ ڪرائي ڇڏيو آهي۔
گڏيل قومن جي سيڪريٽري جنرل انتونيو گوتيريش، سلامتي ڪائونسل ۽ جنرل اسيمبلي کي لکيل خط ۾ امير سعيد ايرواني چيو ته اسرائيلي بچاءَ واري وزير اسرائيل ڪاٽز جي اها ڌمڪي ايراني حڪومتي عملدارن کي نشانو بڻائڻ واري هڪ سوچيل سمجهيل ۽ منظم رياستي دهشتگردي جي پاليسي جو حصو آهي۔
هن چيو ته اها ڌمڪي ايران خلاف اسرائيلي حڪومت جي غيرقانوني جارحاڻي ڪاررواين سان ڳنڍيل آهي، جن ۾ مرحوم ايراني اڳواڻ آيت الله سيد علي خامنه اي ۽ ٻين اعليٰ سياسي ۽ فوجي عملدارن جو قتل شامل آهي، جيڪي سندس دعويٰ موجب آمريڪا جي شموليت، رابطي ۽ حمايت سان انجام ڏنا ويا۔
امير سعيد ايرواني وڌيڪ چيو ته گڏيل قومن جي سلامتي ڪائونسل اسرائيل کي بنا ڪنهن جوابدهي جي ڪارروايون ڪرڻ جي اجازت ڏني آهي، ۽ خبردار ڪيو ته تهران ڪنهن به دشمنانه قدم جو جواب ڏيندو۔
هن چيو ته بدقسمتي سان سلامتي ڪائونسل پاران گڏيل قومن جي منشور تحت پنهنجون ذميواريون پوريون نه ڪرڻ سبب سزا کان استثنا وارو ماحول وڌيڪ مضبوط ٿيو آهي، جنهن جي نتيجي ۾ اسرائيلي حڪومت رياستي دهشتگردي کي معمول بڻائڻ ۾ وڌيڪ دلير ٿي وئي آهي۔ سندس چوڻ موجب اهو هڪ انتهائي خطرناڪ مثال قائم ڪري ٿو ۽ بين الاقوامي امن ۽ سلامتي لاءِ سنگين خطرو آهي۔
