چين آمريڪا طرفان لاڳو ڪيل پابندين جو جواب ڏيندي 10 آمريڪي فوجي ڪمپنين جي برآمدات تي پابندي لڳائي ڇڏي آهي۔
چيني واپار واري وزارت موجب انهن 10 آمريڪي فوجي ڪمپنين کي ڊوئل يوز (dual-use) شين جي فراهمي روڪي وئي آهي، يعني اهڙيون شيون جيڪي فوجي ۽ غير فوجي ٻنهي مقصدن لاءِ استعمال ٿي سگهن ٿيون۔
چيني واپار واري وزارت جو چوڻ آهي ته هي قدم چين جي قومي سلامتي جي تحفظ ۽ آمريڪي حڪومت طرفان چيني فوجي ڪمپنين جي نام نهاد فهرست ۾ غلط واڌ جي جواب طور کنيو ويو آهي۔
واضح رهي ته هن مهيني جي شروعات ۾ آمريڪي دفاع واري وزارت چين جون مشهور وڏيون ڪمپنيون جهڙوڪ علي بابا، بي واءِ ڊي ۽ بائيڊو انهن ڪمپنين جي فهرست ۾ شامل ڪيون هيون، جن بابت دعويٰ ڪئي وڃي ٿي ته اهي چيني فوجي نظام سان لاڳاپيل آهن۔
