جماعت اسلامي جي امير حافظ نعيم الرحمان چيو آهي ته حڪومت کي پيٽرول جي قيمت ٽن سالن لاءِ 225 رپيا فڪس ڪرڻ گهرجي۔
ڪراچي ۾ پريس ڪانفرنس ڪندي هن چيو ته مهانگائي جي دور ۾ خانگي شعبي لاءِ ڪو به رليف نه ڏنو ويو آهي، پگهارن ۾ به ڪو اضافو ناهي ڪيو ويو، تنهنڪري خانگي شعبي جي ملازمن جي پگهارن ۾ واڌ جو مطالبو ڪريون ٿا۔
جماعت اسلامي جي امير جو چوڻ آهي ته حڪومت جو اڌ بجيٽ وياج ۾ هليو وڃي ٿو، اعليٰ عدالتي حڪمن باوجود حڪومت وياج ختم ڪرڻ ۾ سنجيده ناهي۔ نئين بجيٽ ۾ ڪا به نئين ڳالهه ناهي، بجيٽ ۾ پگهارن ۾ 7 سيڪڙو واڌ ڪئي وئي جڏهن ته مهانگائي 8 سيڪڙو وڌي وئي آهي۔
حافظ نعيم الرحمان چيو ته پيپلز پارٽي جمهوريت جي قاتل آهي، جمهوريت ۽ پيپلز پارٽي هڪ ٻئي جي ضد آهن. صوبي تي 18 سالن کان پيپلز پارٽي جو قبضو آهي، جڏهن ته سنڌ ۾ ٻارن کي تعليم ۽ صحت ڇو نٿي ملي؟ بنيادي صحت مرڪزن جو به خراب حال آهي، سنڌ ۾ تعليم، روزگار ۽ صحت جو سخت فقدان آهي، شهر ۾ سرڪاري پبلڪ ٽرانسپورٽ موجود ناهي. سوال انهن کان ٿيڻ گهرجن جن ماڻهن ميئر ۽ پيپلز پارٽي کي اسان تي مسلط ڪيو۔
جماعت اسلامي جي امير جو چوڻ آهي ته گلگت بلتستان ۾ ميمبرن جي خريد ۽ وڪرو اسان جي ٽيڪسن جي پئسن سان ڪئي پئي وڃي، پيٽرول تي ليوي انهن تي لاڳو ڪئي پئي وڃي جيڪي ٽيڪس کان مستثنيٰ آهن، ليوي ان لاءِ گهٽ ڪئي وئي ته ٽارگيٽ پورو ٿي ويو، ليوي جو نفاذ ناجائز آهي، ان کي فوري طور ختم ڪيو وڃي. بجيٽ ۾ اهو نٿو ٻڌايو ويو ته آءِ پي پيز جي خاتمي لاءِ ڇا قدم کنيا پيا وڃن. جتي به آءِ ايم ايف وڃي ٿي، اتي جي معيشت تباهي طرف وڃي ٿي۔
