موسميات کاتي خبردار ڪيو آھي تہ سنڌ جي فضا ۾ موجود ھاءِ پريشر ايريا سڀاڻي کان وڌيڪ طاقتور ھئڻ جو امڪان آھي جنھن سبب صوبي جي ڪيترن ئي ضلعن ۾ 31 مئي تائين شديد ھيٽ ويو جي صورتحال برقرا رھي سگھي ٿي.
موسميات کاتي عوام خاص طور تي ٻارن، عورتن ۽ بزرگن کي احتياطي تدبيرون اختيار ڪرڻ جي ھدايت ڪئي آھي جڏھن تہ آبادگارن کي موسمي حالتن مطابق فصلن ۽ چوپائي مال جي سار سنڀال جي صلاح ڏني آھي.
موسميات کاتي مطابق سکر،لاڙڪاڻو، دادو سميت مختلف ضلعن ۾ گرمي پد 47 کان 50 ڊگري سينٽي گريڊ تائين وڃڻ جو امڪان آھي.
اھڙي طرح ٿرپارڪر، بدين، حيدرآباد، ميرپور خاص ۽ ڄامشورو ۾ گرمي پد 44 کان 47 ڊگري سينٽي گريڊ جي وچ ۾ رھي سگھي ٿو.
موسميات کاتي جو چوڻ آھي تہ ھيٽ ويو دوران بجلي جي گھرج ۽ واھپي ۾ اضافي جو بہ امڪان آھي جنھن سبب شھرين کي غير ضروري بجلي جي استعمال کان پاسو ڪرڻ جي ھدايت ڪئي وئي آھي.
ٻئي طرف ڪراچي ۾ سومر ۽ اڱاري تي گرمي پد 34 کان 36 ڊگري سينٽي گريڊ جڏھن تہ اربع تي 35 کان 37 ڊگري سينٽي گريڊ رھڻ جو امڪان ظاھر ڪيو ويو آھي.
