پاڪستان جي ٽي وي ميزبان ۽ اداڪارا ناديه خان ڀارتي اداڪارائن ايشوريا راءِ ۽ ڪترينا ڪيف جي مبينا ڪاسميٽڪ پروسيجرز تي تنقيد ڪندي چيو آهي ته انهن پروسيجرز سندن فطري خوبصورتي کي متاثر ڪيو آهي۔
ناديه خان تازو پنهنجي مارننگ شو دوران ڪاسميٽڪ پروسيجرز جي ممڪن اثرن بابت ڳالهائيندي مختلف پهلوئن تي روشني وڌي۔
هن چيو ته ڪاسميٽڪ پروسيجرز ڪرائڻ کان اڳ ماڻهن جي ذهن ۾ اهو خوف موجود هوندو آهي ته ڪٿي سندن چهرو به ايشوريا راءِ ۽ ڪترينا ڪيف وانگر متاثر نه ٿي وڃي۔
اداڪارا جو چوڻ هو ته ايشوريا راءِ ۽ ڪترينا ڪيف دنيا جي سڀ کان خوبصورت عورتن ۾ شمار ٿين ٿيون، پر مبينا طور تي انهن پروسيجرز کان پوءِ سندن چهرن جي قدرتي خوبصورتي متاثر ٿي آهي۔ هن چيو ته جيڪڏهن انهن سان ائين ٿي سگهي ٿو ته پوءِ عام ماڻهن جو ڇا ٿيندو؟
هن وڌيڪ چيو ته سندس خيال ۾ ڪڏهن ڪڏهن ڪاسميٽڪ علاج کان پوءِ چهرو پنهنجي اڳوڻي حالت ۾ واپس نٿو اچي۔
ناديه خان سوال اٿاريندي چيو ته هن ڪيفيت کي ڇا چئبو آهي؟ ڇا ان کي “پلو فيس” چيو ويندو آهي؟ آخر انهن جي چهري کي ڇا ٿيو آهي؟
ان موقعي تي پروگرام ۾ موجود ماهرِ جماليات وضاحت ڪندي چيو ته چهري جي هر حصي ۾ فلرز جو استعمال ضروري نه هوندو آهي۔
هن چيو ته جيڪڏهن چهري جي مختلف حصن ۾ ضرورت کان وڌيڪ فلرز استعمال ڪيا وڃن ته ان سان چهري جا خدوخال متاثر ٿي سگهن ٿا ۽ چهرو غير فطري طور وڏو يا ڦوڪيل نظر اچڻ لڳندو آهي۔ هن وڌيڪ چيو ته چهري جي ڍلاڻ يا ابھار کي صرف فلرز ذريعي مڪمل طور درست نٿو ڪري سگهجي۔
ماهرِ جماليات موجب ڪڏهن ڪڏهن فلرز جي حد کان وڌيڪ استعمال سبب چهري جي بناوت ۾ نمايان تبديلي اچي ويندي آهي۔
