واشنگٽن (انٽرنيشنل ڊيسڪ): آمريڪي صدر ڊونلڊ ٽرمپ جي انتظاميا ۾ هڪ ٻئي اهم عهديدار جي استعيفيٰ جو اعلان سامهون آيو آهي، آمريڪي فوج جو سيڪريٽري ڊين ڊرسڪول تقريبن 18 مهينا عهدي تي رهڻ کانپوءِ استعيفيٰ ڏئي رهيو آهي. آمريڪي ميڊيا موجب سندس استعيفيٰ جي پسمنظر ۾ دفاع واري وزير پيٽ هيگسيٿ سان ڪيترن ئي مهينن کان هلندڙ اختلاف ۽ ڇڪتاڻ پڻ شامل آهي.
آمريڪي ميڊيا جي رپورٽن موجب ڊين ڊرسڪول جي عهدي تان الڳ ٿيڻ جي تصديق ٿي چڪي آهي. هو آمريڪي فوج جي تاريخ ۾ هن عهدي تي مقرر ٿيندڙ سڀ کان گهٽ عمر وارن سيڪريٽرين مان هڪ رهيو آهي ۽ صدر ڊونلڊ ٽرمپ جي ڊرون ٽيڪنالاجي تي زور ڏيڻ سبب کيس اڪثر ”ٽرمپ جو ڊرون مين“ پڻ چيو ويندو رهيو آهي.
دفاع واري وزير سان اختلافن جون خبرون
رپورٽن موجب ڊين ڊرسڪول ۽ آمريڪي دفاع واري وزير پيٽ هيگسيٿ وچ ۾ ڪيترن ئي مهينن کان اختلاف ۽ ٽڪراءُ جاري هو. ٻنهي وچ ۾ اختلافن جي نوعيت بابت تفصيلي ڄاڻ سامهون نه اچي سگهي آهي، پر ڊرسڪول جي استعيفيٰ کي ٽرمپ انتظاميا ۾ اعليٰ فوجي قيادت جي سطح تي ٿيندڙ تازين تبديلين سان جوڙيو پيو وڃي.
وائيٽ هائوس طرفان ڊين ڊرسڪول بابت جاري ڪيل بيان ۾ سندس خدمتن کي ساراهيو ويو آهي. بيان موجب ڊرسڪول صدر ٽرمپ جي ”آمريڪا کي ٻيهر مضبوط بڻائڻ“ واري ايجنڊا کي اڳتي وڌائڻ ۾ انتهائي اثرائتو ثابت ٿيو ۽ فوجي آپريشنز دوران سندس قيادت شاندار رهي.
ٽرمپ انتظاميا ۾ اعليٰ فوجي آفيسرن جون مسلسل تبديليون
ڊرسڪول جي استعيفيٰ اهڙي وقت سامهون آئي آهي، جڏهن تازو ڪجهه ٻين اهم فوجي ۽ دفاعي عهديدارن به پنهنجا عهدا ڇڏيا آهن.
انهن ۾ نيوي سيڪريٽري جان فيلن پڻ شامل آهي، جنهن اپريل ۾ اوچتو پنهنجي عهدي تان استعيفيٰ ڏني هئي. ان کان علاوه فوج جي سربراهه رينڊي جارج، آرمي جنرل ڊيوڊ هڊني ۽ ميجر جنرل وليم گرين پڻ تازو پنهنجي عهدن تان الڳ ٿي چڪا آهن.
رپورٽن موجب پيٽ هيگسيٿ جي دفاع واري وزارت جي سربراهي سنڀالڻ کانپوءِ هڪ درجن کان وڌيڪ سينيئر فوجي آفيسرن کي سندن عهدن تان هٽايو ويو آهي، جن ۾ آمريڪي نيوي آپريشنز جو سربراهه ۽ آمريڪي هوائي فوج جو ڊپٽي چيف پڻ شامل آهن.
ڊين ڊرسڪول جي استعيفيٰ سان آمريڪي فوج جي اعليٰ قيادت ۾ جاري تبديلين بابت بحث وڌيڪ تيز ٿيڻ جو امڪان آهي، جڏهن ته سندس ۽ دفاع واري وزير وچ ۾ اختلافن کي استعيفيٰ جي اهم سببن مان هڪ قرار ڏنو پيو وڃي.
