تهران/زيورخ/واشنگٽن: (انٽرنيشنل ڊيسڪ) آمريڪي فٽبال ٽيم جي اسٽار اسٽرائيڪر فولارين بالوگن تي لڳايل هڪ ميچ جي پابندي ختم ڪرڻ واري فيفا جي فيصلي عالمي فٽبال ۾ نئون تڪرار پيدا ڪري ڇڏيو آهي. فيصلي کان پوءِ فيفا تي سياسي دٻاءَ هيٺ اچڻ جا الزام لڳايا پيا وڃن، جڏهن ته آمريڪي صدر ڊونلڊ ٽرمپ به سخت تنقيد جي زد ۾ اچي ويو آهي.
ورلڊ ڪپ جي ميچ دوران بالوگن کي بوسنيا خلاف خطرناڪ ٽيڪل ڪرڻ تي سڌو ريڊ ڪارڊ ڏيکاريو ويو، جنهن سبب هو ايندڙ ناڪ آئوٽ ميچ لاءِ خودڪار طور معطل ٿي ويو. فيفا جي عام ضابطن موجب اهڙي سزا خلاف اپيل جو ڪو واضح رستو نه هوندو آهي.
فيفا پنهنجي ڊسيپلينري ڪوڊ جي آرٽيڪل 27 تحت غيرمعمولي اختيار استعمال ڪندي بالوگن جي هڪ ميچ واري پابندي معطل ڪري ڇڏي، جنهن سان هو بيلجيم خلاف اهم ميچ کيڏڻ جو اهل بڻجي ويو. فيفا جو چوڻ هو ته ضابطن تحت اهڙي رعايت خاص حالتن ۾ ڏئي سگهجي ٿي.
رپورٽن موجب آمريڪي صدر ڊونلڊ ٽرمپ فيفا جي صدر جياني انفانٽينو سان رابطو ڪري بالوگن جي معاملي تي نظرثاني جي درخواست ڪئي. پابندي ختم ٿيڻ کان پوءِ ٽرمپ ان فيصلي کي “هڪ وڏي ناانصافي جي درستگي” قرار ڏيندي فيفا جو شڪريو به ادا ڪيو، جنهن کان پوءِ سياسي مداخلت بابت سوال وڌيڪ زور وٺي ويا.
بيلجيم جي فٽبال فيڊريشن ۽ ڪيترن يورپي مبصرن فيفا جي فيصلي تي سخت اعتراض ڪندي چيو ته جيڪڏهن ريڊ ڪارڊ جهڙيون سزائون به سياسي يا انتظامي دٻاءَ هيٺ تبديل ٿيڻ لڳيون ته عالمي فٽبال جي شفافيت ۽ انصاف تي سوال اٿندا. ڪجهه حلقن قانوني ڪارروائي تي به غور ڪري رهيا آهن.
برطانوي ميڊيا ۽ ڪيترن تجزيه نگارن هن واقعي کي طنزيه انداز ۾ “ريڊ ڪارڊ کان وڌيڪ طاقتور ٽرمپ ڪارڊ” قرار ڏنو آهي. سندن چوڻ آهي ته هن واقعي راند ۽ سياست جي حدن بابت هڪ ڀيرو ٻيهر عالمي بحث ڇيڙي ڇڏيو آهي، ۽ هاڻي فيفا کي پنهنجي فيصلن جي شفافيت بابت وڌيڪ جواب ڏيڻا پوندا.
