واشنگٽن/ڪويت (انٽرنيشنل ڊيسڪ): ايران ۽ آمريڪا وچ ۾ ڇڪتاڻ ۾ وڌيڪ اضافو ٿي ويو آهي، جتي آمريڪي صدر ڊونلڊ ٽرمپ ايران تي ٻيهر حملي لاءِ تياري جو اشارو ڏنو آهي ته ڪويتي فوج دعويٰ ڪئي آهي ته ملڪ جو فضائي دفاع ايراني ميزائل ۽ ڊرون حملن کي روڪڻ لاءِ ڪارروائي ڪري رهيو آهي. خطي جي صورتحال تي اسرائيل بابت به ٽرمپ جو اهم بيان سامهون آيو آهي، جڏهن ته هڪ نيوز ايجنسي دعويٰ ڪئي آهي ته آمريڪي انتظاميا نومبر جي مڊ ٽرم چونڊن تائين ايران خلاف جنگ کي محدود رکڻ چاهي ٿي.
آمريڪي صدر ڊونلڊ ٽرمپ وائيٽ هائوس ۾ ميڊيا سان ڳالهائيندي ايران خلاف ٻيهر فوجي ڪارروائي جو اشارو ڏنو آهي.
ٽرمپ چيو ته آمريڪا ايران تي هڪ ٻي حملي لاءِ تيار آهي، جڏهن ته ايران خلاف نئين مهم گهڻو وقت جاري نه رهندي.
آمريڪي صدر دعويٰ ڪئي ته ايراني حڪومت وقت سان گڏ ڪمزور ٿيندي پئي وڃي ۽ آمريڪا ايران ۾ ”حيران ڪندڙ نتيجا“ حاصل ڪري رهيو آهي.
هن چيو ته آمريڪا ايران کي ايٽمي هٿيار حاصل ڪرڻ جي اجازت نه ڏيندو، جڏهن ته سندس دعويٰ موجب ايران ٻيهر پنهنجا ريڊار ۽ ميزائل نظام بحال ڪرڻ جي ڪوشش ڪري رهيو آهي.
ٽرمپ جو چوڻ هو ته ايران جي هر سرگرمي تي آمريڪا جي گهري نظر آهي ۽ ايراني عوام جلد پنهنجي حڪومت خلاف اٿي بيهندو.
هن وڌيڪ دعويٰ ڪئي ته ايران ۾ 65 هزار مظاهرين مارجي چڪا آهن ۽ ايراني حڪومت مظاهرين کي گولين جو نشانو بڻائي رهي آهي.
صدر ٽرمپ ايران تي ٻيهر حملي جي تياري سان گڏ آبنائي هرمز تي مڪمل ڪنٽرول جو به دعويٰ ڪيو آهي.
آبنائي هرمز عالمي توانائي جي فراهمي لاءِ انتهائي اهم سامونڊي رستو سمجهي وڃي ٿي، تنهن ڪري هتي پيدا ٿيندڙ ڪنهن به وڏي ڇڪتاڻ جا اثر عالمي تيل مارڪيٽ ۽ خطي جي سلامتي تي پئجي سگهن ٿا.
ٻئي طرف ايران سان وڌندڙ ڇڪتاڻ تي آمريڪي صدر اسرائيل کي به خاطري ڪرائي آهي ته کيس پريشان ٿيڻ جي ضرورت ناهي.
ٽائمز آف اسرائيل موجب، هڪ اسرائيلي سرڪاري نشرياتي اداري کي ٽيليفون انٽرويو ڏيندي ٽرمپ چيو ته اسرائيلين کي آمريڪا ۽ ايران وچ ۾ وڌندڙ ڇڪتاڻ بابت فڪر نه ڪرڻ گهرجي.
ٽرمپ چيو ته: ”اسرائيل کي پريشان نه ٿيڻ گهرجي، خبر آهي ڇو؟ ڇو ته مان صدر آهيان ۽ مان اسرائيل جو خيال رکندس.“
ٽرمپ جي ان بيان مان واضح ٿئي ٿو ته آمريڪا ايران سان وڌندڙ ڇڪتاڻ دوران اسرائيل جي سلامتي کي پنهنجي پاليسي ۾ اهم حيثيت ڏئي رهيو آهي.
هوڏانهن هڪ پرڏيهي خبر ايجنسي دعويٰ ڪئي آهي ته آمريڪي انتظاميا چاهي ٿي ته ايران سان جاري جنگ نومبر ۾ ٿيندڙ مڊ ٽرم چونڊن تائين محدود ۽ گهٽ شدت سان جاري رهي.
رپورٽ موجب، نومبر ۾ وچ مدتي چونڊن کانپوءِ ايران خلاف آمريڪي حملن ۾ وڌيڪ شدت اچڻ جو امڪان موجود آهي.
خبر ايجنسي دعويٰ ڪئي آهي ته صدر ٽرمپ جا ساٿي ايران سان جنگ کي چونڊن تائين ڪنٽرول ۾ رکڻ چاهين ٿا، جيئن ريپبلڪن پارٽي کي چونڊن ۾ امڪاني نقصان کان بچائي سگهجي.
رپورٽ موجب، چونڊن تائين ٽرمپ انتظاميا جي ڪوشش آهي ته ايران خلاف فوجي ڪارروائي وڌائڻ بدران اقتصادي دٻاءُ برقرار رکيو ۽ وڌيڪ وڌايو وڃي.
ايران ۽ آمريڪا وچ ۾ ڇڪتاڻ جا اثر خليجي خطي تائين به پهچي ويا آهن.
ڪويتي فوج جو چوڻ آهي ته ملڪ جو فضائي دفاعي نظام ايران طرفان ڪيل ميزائل ۽ ڊرون حملن کي روڪڻ لاءِ ڪارروائي ڪري رهيو آهي.
ڪويتي فوج سوشل ميڊيا پليٽ فارم ايڪس تي جاري ڪيل بيان ۾ چيو ته شهرين کي ٻڌڻ ۾ ايندڙ ڌماڪن جا آواز فضائي دفاعي نظام طرفان ميزائل ۽ ڊرون حملن کي روڪڻ جي نتيجي ۾ آهن.
ڪويتي فوج عوام کي هدايت ڪئي آهي ته لاڳاپيل اختيارين طرفان جاري ڪيل حفاظتي ۽ سيڪيورٽي هدايتن تي سختي سان عمل ڪيو وڃي.
ايران تي ٻيهر آمريڪي حملي جي امڪان، اسرائيل بابت ٽرمپ جي بيان، آبنائي هرمز تي مڪمل ڪنٽرول جي دعويٰ ۽ ڪويت ۾ ايراني ميزائل ۽ ڊرون حملن کي روڪڻ لاءِ فضائي دفاع فعال ٿيڻ کانپوءِ وچ اوڀر جي صورتحال وڌيڪ حساس بڻجي وئي آهي.
جيڪڏهن ڇڪتاڻ ۾ وڌيڪ اضافو ٿئي ٿو ته ان جا اثر رڳو ايران، آمريڪا ۽ اسرائيل تائين محدود رهڻ بدران خليجي ملڪن جي سلامتي، توانائي جي فراهمي، آبنائي هرمز ۽ عالمي تيل مارڪيٽ تي به پئجي سگهن ٿا.
