اسلام آباد (بيورو رپورٽ): مهانگائي جي ماريل بجلي واهپيدارن لاءِ هڪ ٻي خراب خبر سامهون اچي وئي آهي، نيپرا بجلي جي قيمت ۾ في يونٽ 2 رپيا 6 پئسا واڌ جو نوٽيفڪيشن جاري ڪري ڇڏيو آهي، جنهن جو اضافي بار سيپٽمبر 2026ع جي بجلي بلن ۾ واهپيدارن کي برداشت ڪرڻو پوندو.
نيشنل اليڪٽرڪ پاور ريگيوليٽري اٿارٽي (نيپرا) موجب بجلي جي قيمتن ۾ واڌ ماهوار ايڊجسٽمينٽ تحت ڪئي وئي آهي. جولاءِ جي فيول پرائس ايڊجسٽمينٽ جي مد ۾ واهپيدارن کان مجموعي طور 33 ارب رپيا اضافي وصول ڪيا ويندا.
نيپرا جي نوٽيفڪيشن موجب ماهوار ايڊجسٽمينٽ تحت بجلي جي قيمت ۾ 2 رپيا 6 پئسا في يونٽ اضافو ڪيو ويو آهي.
هن واڌ جو سڌو اثر سيپٽمبر 2026ع ۾ جاري ٿيندڙ بجلي جي بلن تي پوندو، جنهن سبب واهپيدارن جا ماهوار بل وڌيڪ وڌڻ جو امڪان آهي.
نيپرا موجب جولاءِ جي فيول پرائس ايڊجسٽمينٽ جي بنياد تي واهپيدارن تي تقريبن 33 ارب رپين جو اضافي مالي بار منتقل ٿيندو.
بجلي واهپيدارن لاءِ رڳو ماهوار ايڊجسٽمينٽ تائين معاملو محدود ناهي، پر ٽه ماهي ايڊجسٽمينٽ تحت به بجلي جي قيمت ۾ 52 پئسا في يونٽ واڌ جو فيصلو ڪيو ويو آهي.
نيپرا طرفان اپريل کان جون 2026ع واري ٽه ماهي ايڊجسٽمينٽ بابت فيصلو وفاقي حڪومت ڏانهن موڪليو ويو آهي.
هن واڌ جو اطلاق سيپٽمبر کان نومبر 2026ع تائين ٿيندو.
نيپرا موجب ٽه ماهي ايڊجسٽمينٽ تحت ڪيل واڌ جو اطلاق ڪي اليڪٽرڪ جي واهپيدارن تي به ٿيندو.
اختيارين جو چوڻ آهي ته ٽه ماهي ايڊجسٽمينٽ جي نتيجي ۾ بجلي واهپيدارن تي مجموعي طور 12 ارب 67 ڪروڙ رپين جو اضافي بار پوندو.
بجلي جي ماهوار ۽ ٽه ماهي ايڊجسٽمينٽ تحت ٿيندڙ تازين واڌن سان ملڪ جي لکين بجلي واهپيدارن جا خرچ وڌيڪ وڌڻ جو امڪان آهي.
هڪ طرف ماهوار ايڊجسٽمينٽ تحت سيپٽمبر جي بلن ۾ في يونٽ 2 رپيا 6 پئسا واڌ لاڳو ڪئي پئي وڃي، ته ٻئي طرف سيپٽمبر کان نومبر تائين ٽه ماهي ايڊجسٽمينٽ جي مد ۾ وڌيڪ 52 پئسا في يونٽ وصول ڪيا ويندا.
اهڙي ريت بجلي جي قيمتن ۾ تازو اضافو گهريلو واهپيدارن، ڪاروباري طبقن ۽ ٻين بجلي استعمال ڪندڙن لاءِ اضافي مالي بار جو سبب بڻجڻ جو امڪان آهي.
