اسلام آباد (بيورو رپورٽ): وفاقي حڪومت ننڍن دڪاندارن کي ٽيڪس نظام ۾ شامل ڪرڻ لاءِ ريٽيلر اسڪيم ايپ باقاعده لانچ ڪرڻ جو اعلان ڪري ڇڏيو آهي. ناڻي واري وزير محمد اورنگزيب چيو آهي ته ايپ جي ذريعي ننڍن واپارين لاءِ ٽيڪس اسڪيم کي آسان بڻايو ويو آهي.
اسلام آباد ۾ پريس ڪانفرنس ڪندي ناڻي واري وزير محمد اورنگزيب چيو ته ٽيڪس نظام کي آسان ۽ اثرائتو بڻائڻ حڪومت جي ترجيح آهي. هن چيو ته جيڪڏهن ڪو طبقو ٽيڪس نظام ۾ شامل نه ٿيندو ته ٽيڪس نظام موثر طريقي سان نٿو هلي سگهي، تنهن ڪري ننڍن دڪاندارن کي سهولتون فراهم ڪرڻ ضروري آهي.
مملڪتي وزير بلال اظهر ڪياني چيو ته ٽيڪس جو دائرو وڌائڻ لاءِ مختلف قدم کنيا پيا وڃن ۽ ريٽيلر اسڪيم ايپ جو اڄ کان باقاعده اجرا ڪيو ويو آهي. سندس چوڻ هو ته ايپ واپارين جي مشاورت سان تيار ڪئي وئي آهي.
حڪومت موجب ريٽيلر اسڪيم ايپ انهن دڪاندارن لاءِ به آهي، جيڪي هن وقت تائين ٽيڪس نيٽ ۾ شامل ناهن. ايپ ذريعي دڪاندار فائلر بڻجي سگهندا.
حڪومت جو چوڻ آهي ته سيپٽمبر جي پهرين هفتي تائين ايپ مقامي ٻولين ۾ پڻ دستياب هوندي، جڏهن ته اسڪيم ۾ رجسٽرڊ دڪاندارن جي وڪرو تي هڪ سيڪڙو ٽيڪس لاڳو ٿيندو. اسڪيم تحت دڪاندارن کي پوائنٽ آف سيلز جي شرط کان پڻ ڇوٽ ڏني ويندي.
ايف بي آر چيئرمين چيو ته ريٽيلر اسڪيم تحت واپارين کي مڪمل تحفظ فراهم ڪيو ويو آهي ۽ ننڍن واپارين کي بنا هراساني جي عزت سان ٽيڪس ريٽرن فائل ڪرڻ جو موقعو ڏنو ويندو.
هن چيو ته خاص ٽيڪس اسڪيم مان اربين رپين جي آمدني جو اندازو لڳايو ويو آهي. جيڪڏهن اسڪيم ڪامياب ٿي ته ڪيترائي لکين دڪاندار ٽيڪس نيٽ ۾ شامل ٿي سگهن ٿا.
ايف بي آر چيئرمين وڌيڪ چيو ته اسڪيم ۾ شامل واپارين لاءِ هاءِ رسڪ وارو نظام نه رکيو ويو آهي ۽ کين پنهنجي آمدني ۽ خرچن کي کليل نموني ظاهر ڪرڻ جي سهولت ڏني وئي آهي.
