ممبئي (شوبز ڊيسڪ): ڀارتي ٽي وي اداڪارا ديپيڪا ڪڪڙ بيماري دوران وزن وڌڻ تي ماڻهن طرفان ڪيل تنقيد ۽ تبصرن بابت کلي ڳالهائيندي چيو آهي ته ان وقت سندس ذهني ۽ جسماني حالت اهڙي نه هئي جو هوءَ وزن گهٽائڻ تي ڌيان ڏئي سگهي.
پنهنجي تازي يوٽيوب ولاگ ۾ ديپيڪا ڪڪڙ ٻڌايو ته بيماري دوران کيس پنهنجي وڌندڙ وزن بابت ماڻهن جا تبصرا پڙهڻا پوندا هئا، پر ان ڏکي وقت ۾ سندس سموري توجهه صحت ۽ جسماني بحالي تي هئي.
اداڪارا چيو ته هوءَ ڄاڻندي هئي ته سندس وزن وڌي ويو آهي، پر ان وقت هوءَ وزن گهٽائڻ جي پوزيشن ۾ نه هئي. ماڻهن شايد سندس وزن وڌڻ کي ذهني دٻاءُ، وڌيڪ کائڻ يا اڳتي وڌڻ ۾ ناڪامي سان جوڙي ڏٺو هجي، پر حقيقت اها هئي ته هوءَ ان وقت ائين ڪرڻ جي قابل ئي نه هئي.
ديپيڪا چيو ته وڏي بيماري مان گذرڻ دوران انسان پنهنجي ظاهري شخصيت بابت وڌيڪ حساس ٿي ويندو آهي، تنهنڪري ڏکئي وقت ۾ پنهنجي ظاهر ۽ ذاتي سنڀال تي ڌيان ڏيڻ اعتماد بحال ڪرڻ ۾ مددگار ثابت ٿي سگهي ٿو.
هن ٻڌايو ته هاڻي هوءَ ٻيهر پنهنجي ذاتي سنڀال تي ڌيان ڏئي رهي آهي، خاص طور تي وارن جي سار سنڀال تي وڌيڪ توجهه ڏئي رهي آهي.
ديپيڪا چيو ته هوءَ ڪا ”سپر وومين“ ناهي. جن ڏينهن سندس طبيعت خراب هوندي آهي، هوءَ بستر تي آرام ڪندي آهي، ڇاڪاڻ ته ان وقت جسم ۾ طاقت نه هوندي آهي.
جڏهن هوءَ ڪجهه بهتر محسوس ڪندي آهي ته پنهنجي لاءِ ٿوري ڪوشش ڪندي آهي، وار ٺاهيندي آهي، بهتر نظر اچڻ جي ڪوشش ڪندي آهي ۽ پاڻ کي ذهني طور به بهتر رکڻ جي ڪوشش ڪندي آهي.
مشڪل حالتن باوجود مسڪرائڻ ۽ مثبت رهڻ بابت ڳالهائيندي ديپيڪا ڪڪڙ چيو ته مداحن طرفان ملندڙ محبت ۽ حمايت کيس اڳتي وڌڻ جو حوصلو ڏئي ٿي.
هن جي ڳالهين مان واضح ٿئي ٿو ته بيماري دوران ظاهري شڪل بابت ٿيندڙ تنقيد کان وڌيڪ اهم انسان جي صحت ۽ ذهني سڪون آهي، جڏهن ته مداحن جي محبت سندس لاءِ هن ڏکئي مرحلي ۾ طاقت جو سبب بڻجي رهي آهي.
