وينزويلا جي حڪومت موجب اربع ڏينهن آيل زلزلن جي نتيجي ۾ هينئر تائين 900 کان وڌيڪ ماڻهو فوت ۽ 3,360 زخمي ٿي چڪا آهن، جڏهن ته امدادي ڪارڪن طرفان زنده بچيل ماڻهن جي ڳولا جو ڪم جاري آھي۔
گادي واري شهر ڪراڪس سميت ملڪ جي اترين علائقن ۾ زلزلي سبب درجنين عمارتون تباهه ٿي ويون آهن، جنهن کان پوءِ زخمين جو علاج عارضي طبي مرڪزن ۾ ڪيو پيو وڃي۔
هڪ اعليٰ سرڪاري عهديدار موجب سوين بين الاقوامي امدادي ڪارڪن وينزويلا پهچي چڪا آهن، جڏهن ته وڌيڪ امدادي ٽيمون اچڻ جي به اميد آهي۔
آمريڪي جيولوجيڪل سروي (يو ايس جي ايس) موجب اربع ڏينهن آيل پهرين زلزلي جي شدت 7.2 رڪارڊ ڪئي وئي، جڏهن ته ڪجهه سيڪنڊن بعد ان کان به وڌيڪ طاقتور 7.5 شدت وارو ٻيو زلزلو آيو۔
پهريون زلزلو زمين جي سطح کان 20.3 ڪلوميٽر هيٺ ۽ ٻيو 10 ڪلوميٽر جي کوٽائي ۾ آيو هو۔ هي گذريل هڪ صدي دوران ملڪ ۾ ايندڙ سڀ کان طاقتور زلزلن مان هڪ قرار ڏنو پيو وڃي۔
اختيارين موجب گادي واري شهر جي اتر ۾ واقع ساحلي شهر لاگوائيرا سڀ کان وڌيڪ متاثر ٿيو آهي۔ هي شهر ملڪ جي ٻن وڏين بندرگاهن مان هڪ آهي ۽ هتي ئي ملڪ جو سڀ کان وڏو هوائي اڏو پڻ موجود آهي۔
اختيارين جو چوڻ آهي ته اڃا تائين ڪيترائي ماڻهو لاپتا آهن ۽ خدشو آهي ته فوتين جو انگ وڌيڪ وڌي سگهي ٿو۔
لا گوائيرا جي رهواسي ناتاشا ڊياز بي بي سي سان ڳالهائيندي ٻڌايو ته سندس ٻه ڌيئرون، جن جون عمريون 22 ۽ 23 سال آهن، هڪ ڊهي پيل شاپنگ سينٽر جي ملبے هيٺان دٻيل آهن۔ اهي ٻئي اتي ڪم ڪنديون هيون۔
