قطر جي وزيراعظم شيخ محمد بن عبدالرحمٰن آل ثاني خبردار ڪيو آهي ته ڳالهين دوران وڌيڪ رعايتون حاصل ڪرڻ لاءِ وچ اوڀر ۾ فوجي ڇڪتاڻ ٻيهر وڌائڻ واري حڪمت عملي ڪامياب نه ٿيندي.
آڪسفورڊ يونيورسٽي ڊيبيٽنگ سوسائٽي کي خطاب ڪندي قطري وزيراعظم چيو ته قطر جي ثالثن گذريل هڪ هفتي دوران ايران جا پنج دورا ڪيا آهن، جن جو مقصد فوجي تڪرار ٻيهر شروع ٿيڻ کان روڪڻ هو. سندس چوڻ موجب ڪجهه ملاقاتون 15 کان 20 ڪلاڪن تائين جاري رهيون.
هن ڳالهين کي ڏکيو قرار ڏيندي چيو ته ڪنهن به امن معاهدي کي مڪمل طور مثالي نٿو بڻائي سگهجي ۽ نه ئي اهڙي اميد رکڻ گهرجي.
قطري وزيراعظم جو چوڻ هو ته ان باوجود ايران جي جوهري پروگرام، آبنائي هرمز ۾ آزاد سامونڊي آمدرفت ۽ علائقائي سلامتي بابت حتمي معاهدي تائين پهچڻ ممڪن آهي.
هن جا بيان اهڙي وقت سامهون آيا آهن، جڏهن قطر جي امير آمريڪي صدر ڊونلڊ ٽرمپ سان ٽيليفون تي ڳالهائيندي زور ڀريو آهي ته ايران خلاف وڌيڪ فوجي حملن بدران سفارتڪاري جو رستو اختيار ڪيو وڃي.
قطر سميت خطي جا ڪيترائي ملڪ گذريل اٺن مهينن دوران ايران جي جوابي حملن جو نشانو بڻجي چڪا آهن.
قطري وزيراعظم چيو ته ڪو به ملڪ تڪرار ٻيهر شدت اختيار ڪرڻ جو بار برداشت نٿو ڪري سگهي.
هن وڌيڪ ٻڌايو ته قطري ثالث آمريڪي حڪومت جي انهن عملدارن سان گڏجي ڪم ڪري رهيا آهن، جيڪي ڇڪتاڻ گهٽائڻ جا طريقا ڳولي رهيا آهن.
سندس چوڻ موجب آمريڪي حڪومت اندر به اهڙا آواز موجود آهن، جيڪي معاملن کي سمجهه ۽ سفارتڪاري ذريعي حل ڪرڻ جا حامي آهن، جڏهن ته ڪجهه ماڻهن جا ان حوالي سان مختلف خيال آهن.
واضح رهي ته قطري وزيراعظم جو بيان اهڙي وقت سامهون آيو آهي، جڏهن آمريڪي صدر ڊونلڊ ٽرمپ ايران سان سفارتي ڪوششون جاري رکڻ ۽ ٻيهر فوجي حملا شروع ڪرڻ بابت مختلف بيان ڏئي رهيو آهي.
