ڍاڪا (مانيٽرنگ ڊيسڪ) بنگلاديش جي اڳوڻي وزيراعظم شيخ حسينه واجد اعلان ڪيو آهي ته هوءَ ڊسمبر ۾ هر صورت پنهنجي وطن واپس ايندي، ڀلي کيس گرفتاري، قيد يا حياتيءَ جي خطري کي منهن ڏيڻو پوي.
پرڏيهي خابرو اداري ايسوسيئيٽڊ پريس (اي پي) کي اي ميل ذريعي ڏنل جواب ۾ شيخ حسينه چيو ته جيڪڏهن سندس قسمت ۾ موت به لکيل آهي ته هوءَ پنهنجي ماڻهن جي وچ ۾ ۽ پنهنجي ملڪ جي سرزمين تي مرڻ پسند ڪندي.
هن پنهنجي واپسيءَ جو طريقو واضح نه ڪيو ته هوءَ ڀارت مان بنگلاديش ڪيئن پهچندي.
شيخ حسينه آگسٽ 2024ع ۾ شاگردن جي اڳواڻيءَ ۾ ٿيل وڏي عوامي احتجاج کانپوءِ اقتدار ڇڏڻ ۽ ڀارت منتقل ٿيڻ تي مجبور ٿي هئي. احتجاج دوران سيڪيورٽي فورسز جي ڪاررواين ۾ وڏي انگ ۾ ماڻهو مارجي ويا ۽ زخمي ٿيا هئا. گڏيل قومن جي هڪ رپورٽ موجب ان تحريڪ دوران لڳ ڀڳ 1400 ماڻهو مارجي ويا هئا.
2025ع ۾ بنگلاديش جي انٽرنيشنل ڪرائمز ٽربيونل احتجاج ڪندڙن خلاف ڪاررواين ۽ انسانيت خلاف ڏوهن جي الزامن هيٺ شيخ حسينه کي سندس غيرموجودگيءَ ۾ موت جي سزا ٻڌائي هئي.
اڳوڻي وزيراعظم عدالتي فيصلي کي رد ڪندي ڪيس جي قانوني حيثيت تي سوال اٿاريا هئا ۽ ڪنهن به غلط عمل ۾ ملوث هجڻ کان انڪار ڪيو هو. سندس چوڻ آهي ته وطن واپسيءَ تي کيس گرفتاري، قيد، تشدد يا قتل ٿيڻ جو خدشو آهي.
شيخ حسينه جي حڪومت ختم ٿيڻ کانپوءِ نوبيل امن انعام يافته محمد يونس جي سربراهيءَ ۾ عبوري حڪومت قائم ڪئي وئي هئي. بنگلاديش ڪيترائي ڀيرا ڀارت کان اڳوڻي وزيراعظم جي حوالگيءَ جو مطالبو ڪري چڪو آهي، پر ڀارت اڃا تائين کيس بنگلاديش حوالي ناهي ڪيو.
بنگلاديش جي پرڏيهي معاملن واري مملڪتي وزير همايون ڪبير موجب حڪومت ڀارت سان موجود حوالگيءَ جي معاهدي تحت شيخ حسينه کي واپس آڻڻ چاهي ٿي.
ٻئي طرف شيخ حسينه جي جماعت عوامي ليگ تي سياسي سرگرمين ۾ حصو وٺڻ تي پابندي آهي ۽ کيس عام چونڊن ۾ به حصو وٺڻ جي اجازت نه ڏني وئي. فراهم ڪيل رپورٽ موجب فيبروري ۾ ٿيل چونڊن ۾ بنگلاديش نيشنلسٽ پارٽي (بي اين پي) جي اڳواڻ طارق رحمان ڪاميابي حاصل ڪري اقتدار سنڀاليو.
شيخ حسينه موجوده حڪومت تي پنهنجي سياسي ڪارڪنن کي نشانو بڻائڻ جو الزام پڻ لڳايو آهي. سندس دعويٰ آهي ته آگسٽ 2024ع کانپوءِ عوامي ليگ جا گهٽ ۾ گهٽ 20 هزار ڪارڪن مارجي ويا، جڏهن ته هزارين گرفتار ٿيا يا روپوش ٿيڻ تي مجبور ٿيا. ٻئي طرف حڪومت جو موقف آهي ته گرفتاريون مخصوص ڏوهن جي الزامن تحت ڪيون ويون آهن.
شيخ حسينه جي ڊسمبر ۾ وطن واپسيءَ جي اعلان کي بنگلاديش جي اندروني سياست سان گڏ ڀارت ۽ بنگلاديش جي سفارتي لاڳاپن جي حوالي سان به اهم اڳڀرائي قرار ڏنو پيو وڃي.
