اسلام آباد (بيورورپورٽ) ايراني صدر مسعود پزشڪيان جي پاڪستان دوري دوران اسلام آباد ۾ گڏيل پريس ڪانفرنس ۾ هڪ اهم سوال اڀريو، جنهن ۾ ايران جي بيلسٽڪ ميزائل پروگرام بابت ڳالهه ڪئي وئي. ان موقعي تي وزيراعظم شهبازشريف کي واضح موقف اختيار ڪرڻو پيو ۽ هن ايران جي ميزائل پروگرام جي حمايت ڪندي چيو ته دنيا کي هن معاملي ۾ “ٻٽو معيار” نه اختيار ڪرڻ گهرجي.
شهباز شريف چيو ته ايران جو بيلسٽڪ ميزائل پروگرام ڪڏهن به آمريڪا ۽ ايران وچ ۾ ٿيندڙ ڳالهين جي ايجنڊا جو حصو نه رهيو آهي. سندس چوڻ هو ته جيڪڏهن دنيا جا ڪيترائي ملڪ پنهنجي دفاع لاءِ بيلسٽڪ ميزائل رکن ٿا ته پوءِ ايران بابت ئي سوال ڇو اٿاريا وڃن؟ هن سوال ڪيو ته ايران کي ٻين ملڪن وانگر پنهنجي دفاع لاءِ اهڙي صلاحيت رکڻ جو حق ڇو نه هئڻ گهرجي؟
تازو ايران ۽ آمريڪا وچ ۾ لاڳاپن ۾ ڪجهه بهتري آئي آهي ۽ ٻنهي ملڪن وچ ۾ هڪ مفاهمتي يادداشت (MoU) تي صحيحون به ٿيون آهن. ان عمل دوران مغربي ملڪن ۽ خاص طور آمريڪا طرفان ايران جي جوهري ۽ ميزائل پروگرامن بابت خدشا ظاهر ڪيا ويندا رهيا آهن.
اهڙي ماحول ۾ جڏهن ايراني صدر پاڪستان پهتو ته پريس ڪانفرنس دوران ميزائل پروگرام بابت سوال اٿڻ فطري هو، ڇاڪاڻ ته هي موضوع عالمي سفارتڪاري ۾ ايران سان لاڳاپيل سڀ کان حساس معاملن مان هڪ سمجهيو وڃي ٿو.
وزيراعظم چيو ته ايران جي دفاعي صلاحيت بابت ٻٽو معيار قبول نه هئڻ گهرجي. ڪيترائي ملڪ بيلسٽڪ ميزائل رکن ٿا، تنهنڪري صرف ايران کي نشانو بڻائڻ مناسب ناهي. پاڪستان ايران سان هر شعبي ۾ تعاون وڌائڻ چاهي ٿو.پاڪستان خطي ۾ امن ۽ استحڪام لاءِ پنهنجو ڪردار جاري رکندو.
ان موقعي تي صدر پزشڪيان به انتهائي واضح لفظن ۾ چيو ته ايران پنهنجي ميزائل پروگرام تي ڪنهن به قسم جو سمجهوتو نه ڪندو. هن پاڪستان ۽ ان جي قيادت پاران امن لاءِ ڪيل سفارتي ڪوششن کي ساراهيو ۽ ٻنهي ملڪن جي لاڳاپن کي “هڪ جان، ٻه قالب” قرار ڏنو.
سياسي مبصرن موجب شهباز شريف جو بيان پاڪستان جي ان روايتي پاليسي جو اظهار آهي، جنهن تحت اسلام آباد ايران جي سلامتي ۽ خودمختياري جي حق جي حمايت ڪري ٿو، جڏهن ته ساڳئي وقت خطي ۾ امن ۽ ڳالهين ذريعي مسئلن جي حل جو حامي پڻ رهي ٿو. هن بيان سان پاڪستان اهو پيغام ڏيڻ جي ڪوشش ڪئي ته هو ايران جي خلاف ڪنهن به امتيازي يا ٻٽي معيار واري پاليسي جو حامي ناهي.
انهيءَ ڪري مسعود پزشڪيان جي موجودگي ۾ شهباز شريف کي ايران جي بيلسٽڪ ميزائل پروگرام بابت وضاحت ڏيڻي پئي، جيئن پاڪستان جو موقف واضح ٿي سگهي ته ايران کي به ٻين ملڪن وانگر پنهنجي دفاعي صلاحيت برقرار رکڻ جو حق حاصل آهي.
